Gara për 3 vendet e fundit vakante në SPAK, reagon ambasada e SHBA

Ambasada e SHBA në Tiranë ka reaguar lidhur me procesin e plotësimit të vakancave në Prokurorinë e Posaçme, SPAK.

Përmes një postimi në X (Twitter) të faqes zyrtare të ambasadës amerikane thuhet se SHBA presin që plotësimi i 3 vendeve të fundit vakante në SPAK të rezultojë “në përzgjedhjen e atyre prokurorëve më të kualifikuar me nivelet më të larta të guximit, profesionalizmit, integritetit dhe pavarësisë”.

“Ambasada Amerikane po ndjek nga afër intervistat dhe vlerësimet nga Këshilli i Lartë i Prokurorisë për kandidatët për prokurorë që aplikojnë për tre vendet vakante të fundit në SPAK. Shtetet e Bashkuara presin që ky proces vendimtar të rezultojë në përzgjedhjen e atyre prokurorëve më të kualifikuar me nivelet më të larta të guximit, profesionalizmit, integritetit dhe pavarësisë. Shtetet e Bashkuara mbeten të përkushtuara për të mbështetur Shqipërinë teksa ajo lufton korrupsionin, forcon institucionet e saj të drejtësisë dhe mbështet shtetin e së drejtës. SPAK mbetet një pjesë kritike e kësaj përpjekjeje”, thuhet në një postim në Twitter të ambasadës amerikane.

LEXONI GJITHASHTU:

• SPAK mbyll hetimet për Vangjush Dakon
• U pezullua nga detyra për abuzim me tenderë, ish-prefekti i Kukësit në SPAK