Programi i vaksinimit anti-Covid, nesër vijnë 15 mijë doza, 14 mijë të tjera brenda dy javëve të marsit

Kryeministri Edi Rama dhe ministrja e Shëndetësisë Ogerta Manstirliu inspektuan të dielën mjediset e stadiumit kombëtar “Air Albania” të cilat janë kthyer në qendër vaksinimi anti-COVID-19.

Ministrja e Shëndetësisë u shpreh se rreth 800 të moshuar – së bashku me kujdestarët e tyre në qendrat e shtëpive të të moshuarve – janë vaksinuar deri më sot për COVID-19, ndërkohë që totali, prej datës 11 janar janë kryer mbi 13 mijë vaksinime.

Vaksinimi ka vijuar në disa qarqe, si për shembull në Shkodër, Vlorë, Korçë, apo Elbasan, teksa momentalisht po vijohet me vaksinimin e të moshuarve të moshës mbi 80-vjeç, të cilët rekomandohen nga mjekët e familjes.

Kryeministri Edi Rama teksa përshëndeti të moshuarit dhe u uroj atyre shëndet, u shpreh se ditën e hënë pritet të mbërrijnë edhe 15 mijë doza të tjera të vaksinave Pfizer, ndërsa brenda dy javëve të para të marsit “COVAX ka konfirmuar nisjen e furnizimit me vaksinën AstraZeneca”.

“Shpresoj të kemi lajme të mira shumë shpejt, kontaktet janë të vazhdueshme, duket mirë, por të mos flasim para kohe,” – tha Rama.

Ministrja Manastirliu shtoi se nga COVAX priten 14 mijë vaksina të cilat do të synojnë me grup-moshat nën 65-vjeç. Ajo tregoi se aktualisht po vijohet me trajnimin e stafeve që do t’i bashkohen programit të vaksinimit për zonat e tjera të vendit.