Bie numri i të infektuarve me Covid-19, 20 të vdekur në Shqipëri

Ministria e Shëndetësisë bën të ditur se në 24 orët e fundit janë zbuluar 764 raste të reja me coronavirus, ndërsa 20 qytetarë të infektuar kanë humbur jetën. Në krahasim me një ditë më parë vihet re një ulje e infektimeve dhe viktimave nga coronavirus.

Aktulisht në spitalet Covid në Tiranë dhe tre spitalet e tjera rajonale po trajtohen 659 pacientë, prej tyre 43 në terapi intensive, nga të cilët 11 janë të intubuar.

Qarku i Tiranës me 22,974 raste aktive, mbetet më shqetësuesi, pasuar nga Fieri (2,621 raste), Vlora (1,765), Durrësi (1,651) dhe Shkodra (1,367).

Bazuar në të dhënat e fundit, MSH-ja thotë se kanë mposhtur sëmundjen 640 qytetarë, duke e çuar kështu në total numrin e të shëruarve në 70 413, që nga fillimi i epidemisë.

Në vendin tonë për shkak të infektimit me coronavirus kanë ndërruar jetë 1,816 qytetarë, ndërsa shumica e tyre kanë qenë me sëmundje të tjera bashkëshoqëruese.

Qarku më i prekur në vend mbetet ai i Tiranës, i cili kryeson listën si për të infektuarit ashtu dhe për numrin e viktimave. Autoritetet shëndetësore kanë apeluar në mënyrë të vazhdueshme ndaj qytetarëve duke iu kërkuar të zbatojnë me rigorozitet masat anti-covid, me qëllim kryesor, frenimin dhe shkëputjen e përhapjes së infeksionit në popullatë.

Të dhënat e përpunuara nga Euronews Albania tregojnë se muaji shkurt pati rreth 9 mijë raste më shumë se muaji janar ndërkohë që u regjistrua pothuajse dyfishim i viktimave.

Në janar pati 20,676 raste dhe 199 viktima, ndërsa në shkurt 29,040 raste dhe 416 viktima.