Balkan Talks | Shqiprim Arifi: S’duhet të bëjmë pazare territoresh me Serbinë

Kryetari i Luginës së Preshevës, Shqiprim Arifi, tregoi për Balkan Talks në Euronews Albania se ata kanë tre kushte të cilat duhet të zbatohen nga Kosova dhe Serbia për sa i përket dialogut.

“Ne besojmë që të mos ketë shkëmbim territori dhe veriu i Kosovës është pjesë e jona. Ne duhet të kemi strategjitë tona dhe s’kemi pse bazohemi të pëlqimet e Beogradit nuk duhet të bëjmë pazare me të. Po bëmë dialog atëherë humbasim,” – thotë kryetari i Alternativës Shqiprim Arifi.

Sipas z.Arifi pazaret për territore do të sillnin hapjen e konflikteve të tjera.

“Nuk është e logjikshme të bëhet shkëmbimi pasi hapet pazari i Bosnjës, Maqedonisë së Veriut etj.. Përflitet hajde e ndajmë Preshevës rreth hekurudhës, një pjesë në Serbi një pjesë në Kosovë. Ne jemi radhit te politika evropiane, e cila ka qenë më të njëjtat kushte si ne pa ndryshim kufijsh dhe pazare,” – rrëfen kryetari Shqiprim Arifi.

Z.Arifi pret që z.Kurti t’i dërgojë ftesën për të qenë pjesë e dialogut Serbi-Kosovë.

“Unë e pres kërkesën që të jemi pjesë e delegacionit të dialogut dhe të kemi takime e negociata për të krijuar strategjinë,” – tregon Shqiprim Arifi për Balkan Talks në Euronews Albania.

Gjatë intervistës z.Arifi tregoi se pavarësisht përçarjes me partitë e tjera shqiptare, përsa i përket dialogut janë bashkë.

“Nuk është e jashtëzakonshme përçarja, pasi e shohim kudo këtë në Shqipëri dhe Kosovë ka përçarje si te ne. Në këtë pikë jemi të unifikuara, që të ketë një përfaqësues në delegacion. Shoh dritë dhe shpresa është e vetmja që na ka mbetur dhe do luftojmë për këtë,” – rrëfen z.Shqiprim Arifi.

Lexoni gjithashtu:

Balkan Talks | Shqiprim Arifi: Duam të jemi pjesëmarrës në dialogun Kosovë-Serbi