Fluks në pikat kufitare të vendit, Balla: Po ndjekim orë pas ore situatën

Ministri i Brendshëm Taulant Balla, ka reaguar në lidhje me trafikun që është krijuar në disa pika kufitare të vendit, kryesisht në Kapshticë, për shkak se qindra emigrantë po kthehen për festat e fundvitit në vendin e tyre.

Në një postim që ka bërë në rrjetet sociale, Balla është shprehur se po ndjekin orë pas ore situatën në pikat kufitare me Greqinë dhe Maqedoninë e Veriut ndërsa ka falënderuar homologët e tyre për bashkëpunimin për menaxhimin e situatës.

“Gjatë festave shumë bashkëatdhetarë dhe turistë të shumtë vijnë në Shqipëri për të festuar Krishtlindjen dhe ndërrimin e viteve. Po ndjekim orë pas ore situatën në pikat e kalimit kufitar me Greqinë dhe Maqedoninë e Veriut (Kakavijë, Kapshticë, Qafëthanë) ku në momente të caktuara krijohen radhë të mjeteve që presin të hyjnë në Shqipëri kryesisht.

Dëshiroj të falenderoj kolegët ministra të Greqisë dhe Maqedonisë së Veriut përkatësisht Giannis Oikonomou dhe Oliver Spasovski, me të cilët sapo kam komunikuar, për gatishmërinë dhe bashkëpunimin në shtimin e sporteleve dhe punonjësve të policisë në pikat e kontrollit kufitar. Nuk paraqiten vonesa të shumta në pikat e tjera të kalimit me Kosovën dhe Malin e Zi, por vijojmë të ndjekim dhe aty flukset”-shkruan Balla.

LEXONI GJITHASHTU: 

• Fier/ 38-vjeçari çon me dhunë në shtëpi 27-vjeçaren, tenton ta përdhunoj
• Kthimi i emigrantëve| Radhë të gjata në Kapshticë, pala greke personel të reduktuar