Sulmi në Veri, ministri Svelça publikon prova dhe foto: Lidhja me djalin e Vuçiçit

Të tjera detaje kanë dalë nga sulmi terrorist që serbët kryen në 24 shtator në Banjskë, në Veri të Kosovës.

Gjatë një konference për media me kryeministrin Albin Kurti, ministri i Punëve të Brendshme, Xhelal Sveçla bëri një kronologji të gjithë ngjarjes që ndodhi më 24 shtator.

Ai paraqiti fotografi, harta dhe pamje të shkëputura nga droni, për vendndodhjen dhe lëvizjen e anëtarëve të grupit terrorist që sulmoi Policinë e Kosovës.

Svelça publikoi informacione për të dyshuarit e sulmit, duke publikuar fotografi dhe informacione të tjera personale për ta.

Po ashtu, ai nxori edhe dëshmi se Milan Radoiçiç ishte prezent gjatë barrikadave të vitit të kaluar në veri të vendit dhe dëshmi se të dyshuarit e sulmit kanë afërsi me djalin e presidentit Aleksandër Vuçiç.

Në sulmin terrorist në Banjskë ishin pjesëmarrës edhe dy vëllezër, ku njëri nga ta i cili quhet Danijel Gjukiq, shihet në një foto së bashku me djalin e presidentit Vuçiç.

“Është e çuditshme se si djali i një presidentit mund të ketë kësi afërsie me dy vëllezër të cilët, jo vetëm në Kosove janë të kërkuar për trafikim të narkotikëve, por janë të dënuar në Serbi për trafikim të sasive të mëdha të drogës atje”, u shpreh Sveçla.

Sveçla tha se që nga viti 2021 deri më tani, Policia e Kosovës është goditur nga 114 sulme në veri, kryesisht të kryera nga grupi, që sipas tij, kreu sulmin në Banjskë.

Kosova për sulmin në Banjskë fajëson Serbinë, ndërkohë që Beogradi mohon përfshirjen në këtë ngjarje.