“S’ka interes të bashkohet me Serbinë”- Deputetja boshnjake “zbulon” planin e Dodik

Deputetja e Parlamentit të Bosnjë-Hercegovinës, Sabina Çudiç, është shprehur se interesi i liderit të Republikës Srpska, Milorad Dodik, nuk është që të shpallë pavarësinë apo të bashkohet me Serbinë, por të vijojë me gjendjen aktuale të konfliktit, që i shërben destabilizimit të rajonit.

Komentet Çudiç i bëri në një intervistë për “Balkan Talks” në Euronews Albania me gazetarin Franko Egro, ku e krahasoi planin e Dodik me planin e Rusisë në Ballkan, e cila sipas saj, nuk është e interesuar të vendosë në rajon politikën apo kulturën e vetë, por të krijojë destabilitet.

“Nuk mendoj se është në interes të z. Dodik t’i bashkohet Serbisë. Apo edhe të shpallë pavarësinë. Kriza në vetvete është në interesin e tij. Ka çështje që njerëzit si z. Dodik vazhdimisht portretizohen si pjesë e një diskursi të përditshëm, duke përfshirë vazhdimësinë e Republikës Serpska, për t’u bashkuar me Serbinë dhe kështu me radhë.

Ata gjithmonë ndalojnë të ndërmarrin hapa përfundimtarë në drejtimin e këtyre llojeve të politikave, sepse përfitojnë nga status quo-ja. Nuk po përfitojnë nga zgjidhja e problemeve. Është e ngjashme me ndikimin rus në rajon, përpjekjet ruse në rajon nuk janë ndikim kulturor ose politik të Rusisë, por destabilizimi i rajonit është për përfitimet e tyre.

Nëse z. Dodik do të kishte vërtet në mendje interesat e qytetarëve të Republikës Serpska, sigurisht një gjë që do ta pengojë Bosnjën dhe Hercegovinën të bashkohet me BE-në, është një tjetër konflikt. Nuk ka mundësi të ketë një vazhdimësi të Republikës Serbe pa një luftë tjetër në Ballkanin Perëndimor, me potencialin e përhapjes së saj në Serbi, në Kosovë në Mal të Zi, mund të tërheqë edhe shtetet anëtare të BE-së.

Pra, kur ai flet për vazhdimësi, ai në thelb po flet për luftën. Kjo nuk është në interesin, jo vetëm jo në interesin tim, apo interesat e fëmijëve të mi, por nuk është në interesin e qytetarëve të Republikës Serpska. Pra, ai duhet ta dijë që duke u tërhequr në qendrën e konfliktit, po tërheq jo vetëm qytetarët e Republikës Serbe, por të gjithë rajonit”, tha Çudiç.

LEXONI GJITHASHTU:

• SHBA dënojnë incidentet në Bosnjë, paralajmërimi për Dodik
• Pas kërcënimit të SHBA-së, Dodik zbut qëndrimet për ndarje të Bosnjes