Fundjavë e suksesshme për kuqezinjtë në Evropë, shkëlqejnë Selahi, Manaj e Asllani

Futbollistët kuqezi kanë kaluar një tjetër fundjavë të suksesshme me skuadrat e tyre në Evropë, ndërsa synojnë formën e mirë për kampionatin evropian.

Nga Italia, në Turqi e Kroaci, legjionarët kanë bërë detyrën, ndërsa janë vlerësuar maksimalisht.

Rei Manaj në Turqi nuk ka të ndalur, as kur kundërshtari i radhës është një gjigant i futbollit. Sulmuesi i Sivasspor shënoi ndaj Besiktas në Turqi golin e vetëm të përballjes, me vlerën e 3 pikëve. Ky ishte goli i 11-të në kampionatin turk për 26-vjeçarin.

Në Kroaci ishte Lindon Selahi që realizoi një supergol me një gjuajtje të fortë e cila u ndal në rrjetë. Mesfushori shqiptar që aktivizohet me Rijekën e nisi si titullar, duke u vlerësuar si më i miri për të tijtë, ku shënoi golin e fitores në minutën e 75′ e festuar me shqiponjë. Ky ishte një mesazh i qartë edhe për Euro 2024.

Në Itali, Asllani zhvilloi një ndër ndeshjet më të mira me fanellën zikaltër, ndërsa asistoi në golin e vetëm të shënuar në përballjen me Fiorentinën. Elbasanasi u vlerësua me notën 7.3, që ishte ndër më të lartat tek Interit së bashku me Lautaro Martinez dhe portierin Sommer.

Titullar e nisën dhe Ismajli me Empolin, Gjimshiti me Atalantën, Balliu me Rayon e Cikalleshi me Konyaspor.

LEXONI GJITHASHTU:

• Yjet që zgjodhën Arabinë, të pakënaqur! Futbollistët kërkojnë kthimin në Europë
• Viti 2024 nis mbarë për kuqezinjtë, 3 futbollistë shënojnë gol