Shefi i kuzhinës: Orizi i laboratorit me shije skandaloze, të ndalohet me ligj

Shkencëtarët kanë krijuar një lloj të ri ushqimi hibrid,  një oriz “mishtor” që ata thonë se mund të jetë një burim i përballueshëm proteinash.

Kokrrat poroze janë të mbushura me qeliza yndyrore dhe muskulore viçi, të rritura në laborator. Orizi fillimisht u lye me xhelatinë peshku për të ndihmuar qelizat e viçit të ngjiteshin dhe kokrrat u lanë në një enë për 11 ditë që të kultivoheshin, pra fiks shprehja “as mish, as peshk”.

Altin Prenga, shef kuzhine tha në emisionin GoodMorning Albanians në Euronews Albania se orizi i laboratorit ka shije skandaloze dhe duhet të ndalohet me ligj.

“Nuk më duket si ndonjë  arritje e madhe, kimistët dhe shkencëtarët e vërtetë i kanë bërë këto gjëra shumë para kohe. Unë këto i shoh si regres jo si progres. Shoh se e ardhmja është tek rikthimi i natyralitetit. Ajo që është e sigurt është që ai ushqim nuk mund të vijë nga hiçi, ajo gjë mund të ketë vetëm diçka pozitive, që vlen për animalistët që u vjen keq për kafshët kur theren. Jam shumë i sigurt që ka edhe shije skandaloze. Unë do e kisha bërë si Italia, do t’i ndaloja me ligj këto gjëra të prodhuara artificialisht”, tha ai.