Makinën e largoi një djalë, misteri i vrasjes në Durrës: Kush e ndihmoi 19-vjeçaren

Detaje të reja kanë dalë në dritë nga ngjarja e rëndë në Durrës, ku 19-vjeçarja Hygerta Meta, ekzekutoi me armë zjari të atin Pëllumb Meta dhe e groposi në kasollen pranë banesës.

Sipas dëshmisë së vajzës në polici, ajo e kreu krimin e rëndë për shkak se babai ishte shumë autoritar dhe donte ta fejonte jashtë dëshirës së saj.

Vajza tha se ajo dëshironte të vazhdonte studimet e larta, ku ndodhej në vitin e parë për menaxhim biznes dhe jo të martohej.

Fqinjët e 50-vjeçarit të ndjerë deklarojnë se ai ishte një person shumë fanatik që dhe vajzën e parë e kishte martuar me mblesëri në Laç.

Sipas fqinjëve, 50-vjeçari kishte shumë vite që jetonte në Shën Vlash, por ai ndiqte traditat e zonës ku ishte rritur, atë të Krujës, ku vajzat e familjes nuk duhet të martohen me dashuri, por me mblesëri.

Duke u nisur dhe nga përmasat fizike të vajzës, hetuesit kanë dyshime se ajo nuk mund ta ketë kryer e vetme krimin.

Grupi hetimor po vijon punën për gjetjen e armës së krimit.

Hetuesit po punojnë për të zbuluar rolin e personave të tjerë që mund të kenë bashkëpunuar, përfshirë nënën dhe 2 vëllezërit e 19-vjeçares.

50-vjeçari u deklarua i zhdukur nga familjarët 10 ditë më parë, ndërkohë që makina e tij u gjet e braktisur në Parkun Rinia në Durrës. Hetuesit po punojnë për të gjetur personin që ka bërë transportimin e makinës në atë zonë, ku sipas deklarimeve të vajzës ka qenë vetë ajo.

Por burime bëjnë me dije se nga të dhënat e deritanishme mësohet se personi që ka lëvizur makinën është mashkull.

LEXONI GJITHASHTU:

• 19-vjeçarja në Durrës vrau dhe groposi babain, flasin të afërmit: Jemi të tronditur
• “O do arratisesha, o do ta vrisja” – Zbardhet dëshmia e vajzës që groposi të atin