Opozita dorëzon në Kushtetuese padi për ligjin për taksimin e profesioneve të lira

Deputetja e Partisë Demokratike, Jorida Tabaku, e shoqëruar me kolegët e saj të grupit parlamentar depozituan këtë të mërkurë një padi në Kushtetuese mbi ligjin për taksimin e profesioneve të lira.

Tabaku në deklaratën e dhënë për media pas depozitimit të padisë, tha se Gjykata Kushtetuese duhet të ngrihet në nivelin që i takon dhe të mos pranojë një vendim që godet shtresën e mesme.

“Shpresoj shumë që Gjykatat Kushtetuese të ngrihet në nivelin që i takon, dhe të mos caktoj precedentë që janë të rrezikshme për besueshmërinë e saj, e të jap  një vendim në të mirë publike, që në këtë rast shkon me shtresën e mesme”, tha Tabaku.

Deputetja apeloi ndaj t’i gjitha institucioneve në vend, si Avokati i Popullit dhe më gjerë që t’i bashkohen padisë së PD për të frenuar dekretimin e këtij ligji.

“I bëj thirrje kujtdo që do t’i bashkohet kësaj padie si palë, të jap mendimin e vet, nga institucioni i avokatit të popullit, e institucionet e tjera, që duan t’i bashkohen kësaj nisme të grupit parlamentar të PD. Ne besojmë tek forca që kanë institucionet dhe tek ligji, shpresojmë që Gjykata Kushtetuese të mos zhgënjejë”, apeloi Tabaku.