Seria A| Milani parakalon Juventusin, Interi 16 pikë nga vendi i dytë

Gara në kampionatin Italian duket se do të vijojë vetëm për zonën Champions ,aty ku disa skuadra rivalizojnë njëra-tjetrën, teksa sa i përket kreut janë zikaltrit që thuajse kanë mbyllur gjithçka. Në fundjavë, ku tashmë janë luajtur plot 28 ndeshje, Milani parakaloi Juventusin në tabelën e klasifikimit, me bardhezinjtë të cilët regjistruan një tjetër ndeshje pa fitore.

Skuadra e Maksimiliano Allegrit u ndal nga Atalanta në shtëpi, edhe pse për një çast riktheu gjithçka në favor të saj. Bergamaskët e nisën mirë ndeshjen pas një goli të Koopmeiners në minutën e 35’, por në pjesën e dytë Cambiasso e Milik përmbysën rezultatin. Në vijim Atalanta u shfaq rrezikshëm, ndërsa riktheu ekuilibrat sërish me 26-vjecarin holandez Koopmeiners, për të rrëmbyer një pikë me shumë vlerë në Torino.

Më herët ishte Milani ai i cili u ngjit në vendin e dytë në tabelë, pas fitores minimale me Empolin, pas një goli të shënuar nga Pulisic. Amerikani u shërbye nga Okafor, ku edhe pse nuk goditi mirë, e ndali sferën në rrjetë. Aq mjaftoi që ekipi i Piolit të merrtë 3 pikë, për ti rrëmbyer pozitat Juventusit. Në mbrëmje ishte radha e Romës për tu ndalur pas 3 fitoreve radhazi, teksa barazoi me Fiorentinën 2-2.