Interi me hap kampioni, Bolonja blindon zonën “Champions”

Interi ka konfirmuar se nuk ka rivalë në kampionatin italian këtë sezon, ndërsa vijon të thellojë hendekun me vendin e dytë që mbahet nga Milani. Zikaltrit rrëmbyen fitoren e radhës në Serinë A, ndërsa mposhtën Empolin në shifrat 2-0. Ekipi i Simone Inzaghit ishte dominues ndaj kundërshtarit thuajse gjatë gjithë përballjes, ndërsa gjeti avantazhin shumë shpejt me mbrojtësin Di Marco. Fraksioni i parë u mbyll me vetëm një gol të shënuar, ndërsa në të dytin ishte Alexis Sanchez ai që vulosi fitoren 2-0, ndërsa minuta pati dhe për Kristjan Asllanin, që u bë pjesë e sfidës në minutën e 69’.

Kjo ishte fitorja e 25-të e Interit në kampionat, ndërsa mbeten edhe 8 javë deri në përfundim. Një tjetër skuadër që bindi të hënën ishte Bolonja, e cila po blindon dalëngadalë zonën Champions duke u renditur në vendin e katërt, dy pikë pas Juventusit. Të besuarit e Thiago Mottas fituan ndaj Salernitanës së vendit të fundit, duke shënuar 3 herë e mos pësuar asnjë gol. Orsolini, Selemakers dhe Likogiannis ishin autorët e golave, duke regjistruar kështu triumfin e katërt në 5 javët e fundit.

Në sfidat e tjera, Roma u ndal nga Lecce, Cagliari barazoi me Veronën dhe Sassuolo me Udinesen.