RMV| A do të bashkëpunojnë me VMRO? Mexhiti: Ja kushtet për të cilat nuk heqim dorë

Kryetari i Lëvizjes Demokratike në Maqedoninë e Veriut, Izet Mexhiti, është shprehur se koalicioni VLEN është i gatshëm të bashkëpunojë me partinë opozitare VMRO-DPMNE, por me disa kushte që duhen përmbushur patjetër.

Komentet Mexhiti i bëri në një lidhje për Euronews Albania, ku foli lidhur me zgjedhjet presidenciale në RMV, që sipas tij, tani thuajse janë thuajse të përcaktuara dhe vota e shqiptarëve nuk ndryshon asgjë, pasi kandidatja e VMRO-së është shumë përpara. Por ai tha se koalicioni VLEN nuk ka dalë me një qëndrim zyrtar për mbështetjen e ndonjë kandidati për president, duke ua lënë në dorë qytetarëve që të votojnë të lirë.

Ai duke folur lidhur me koalicionet për zgjedhjet e përgjithshme tha se koalicioni VLEN nuk e ka domosdoshmëri të bëhet me një nga palët, nëse ato nuk përmbushin disa kërkesa.

Mexhiti tha se nëse VLEN do të hyjë në koalicion me VMRO-DPMNE, nuk do të bëhen lëshime te integrimi europian, ndryshimet kushtetuese dhe avancimi i çështjes së shqiptarëve atje.

“Nëse e shohim garën, mendoj se shqiptarët janë mjaftueshëm të informuar dhe dinë të bëjnë vlerësime. Shqiptarët në RMV e kanë qenë në krye të detyrës gjithmonë dhe e dinë kë do të votojnë. Ne si VLEN nuk kemi ndonjë qëndrim për mbështetjen e njërit prej kandidatëve që janë në garën e dytë. Edhe pse për hir të së vërtetës gara do të jetë formale.

Dallimi mes kandidates së parë dhe të dytit është i madh. Edhe po ti japim kandidatit të LSDM-së gjithë votat e shqiptarëve, nuk mjaftojnë që ai të zgjidhet president. Jemi i vetmi opsion shqiptar dhe fushatën e bëjmë kryesisht te shqiptarët. Kjo ndoshta është arsyeja që Mickovski nuk i ka dëgjuar fushatat tona. Por fushatat tona kanë nisur dhe përfunduar me eurointegrimet, me orientimin e qeverisë drejt integrimit Europian.

Edhe emërtimi i VLEN është lidhja Europiane për ndryshim. Por ne jemi të fokusuar ta përmbyllim fushatën me sukses dhe pastaj të ulemi në bisedime dhe të diskutojmë që nga ndryshimet kushtetuese, avancimi i çështjes shqiptare, etj. Ne e kemi thënë edhe nëpër tubimet tona, që jo me çdo kusht duhet të jemi pjesë e çfarëdo qeverie. Një qeveri që nuk ka orientim europian, ne nuk e shohim veten pjesë të saj”, tha Mexhiti.

LEXONI GJITHASHTU:

• RMV| Musliu: Me votat e opozitës shqiptare, Bujar Osmani do ishte në raundin e dytë
• Davkova dhe Pendarovski përballen në rundin e 2 të zgjedhjeve presidenciale në RMV