Agresionet kibernetike, Gjermania denoncon sulmet ruse

Qeveria gjermane ka akuzuar Rusinë se fshihet pas një sulmi kibernetik ndaj social-demokratëve, i ndodhur në fillim të vitit të kaluar.

Akuza është bërë nga ministrja e Jashtme, Annalena Baerbock, e cituar nga media të ndryshme gjermane dhe ndërkombëtare, mes të cilave “Die Welt”.

“Hakera të shtetit rus kanë sulmuar hapësirën kibernetike të Gjermanisë. Kjo është e patolerueshme, e papranueshme dhe do të ketë pasoja”, ka deklaruar Baerbock gjatë një vizite në Australi.

Partia Social-Demokrate gjermane kishte denoncuar në qershor të vitit të kaluar se adresat e mesazheve elektronike të presidiumit të partisë kishin qenë objektiva të sulmeve kibernetike në fillim të 2023-shit. Asokohe, Ministria e Jashtme gjermane thirri për sqarime ambasadorin rus në Berlin.

Sulmet dyshohet se janë kryer nga grupi “APT28”, i lidhur me shërbimet e inteligjencës ushtarake ruse, GRU.

Agresione të ngjashme kibernetike janë verifikuar edhe në Republikën Çeke, ku në shënjestër janë vënë disa institucione shtetërore – bëri të ditur të premten Ministria e Jashtme e vendit, sipas të cilës interferencat u konstatuan në vitin 2023.

Duke reaguar ndaj lajmeve, Përfaqësuesi i Lartë i BE-së, Josep Borrell ka deklaruar se Unioni dhe partnerët ndërkombëtarë dënojnë me vendosmëri fushatën dashakeqe kibernetike të kryer nga grupi “APT28” ndaj Gjermanisë dhe Republikës Çeke.

“Këto akte tregojnë modelin e sjelljes së papërgjegjshme të Rusisë në hapësirën kibernetike, duke vënë në shënjestër institucionet demokratike, entet qeveritare dhe infrastrukturën kritike në të gjithë Bashkimin Evropian”, ka thënë Borrell.

LEXONI GJITHASHTU:

• Arrestohet ndihmësi i eurodeputetit gjerman, dyshohet se spiunon për Kinën
• Gjermania arreston dy persona nën dyshimin se spiunonin për Rusinë
• Arrestohen spiunët rusë në Gjermani, planifikonin akte sabotazhi ndaj ushtrisë