U kthyen nga emigrimi dhe investuan në sera me perime, familja Haka: S’ka fitime

Bujqësia është burim jetese për shumë familje shqiptare. Një ndër to është edhe familja Haka, e cila ka 10 vite që kultivon perime në zonën e Peqinit.

Familja Haka, u kthye nga emigrimi, 10 vjet më parë në fshatin Vashaj të Peqinit, për të investuar në bujqësi me kultivimin e perimeve në sera. Sot, Astrit Haka thotë se është i kënaqur me prodhimin, por jo me fitimin.

“U bë tashi 10 vite që merrem me kultivimin e serave, që kur jam kthyer nga emigracioni. Investuam ne sera i mbollëm u kujdesëm, gjithsesi jetojmë. Aktualisht jemi duke kultivuar trangullin. Çmimet janë jo të arsyeshme sivjet”,-tha Astrit Haka.

Haka vëren se tregtarët shpesh abuzojnë me çmimet e produkteve vendase dhe i bëjnë të papërballueshme për konsumatorët.

“Sot isha në treg dhe sot u shit 60 -65 lekë kastraveci. Unë nuk e di kush abuzon me çmimet që konsumatori ta hajë shtrenjtë si trangullin si domaten ashtu edhe të gjithë të tjerët, nuk kam njohuri për këtë, por di që ne vuajmë nga tregu, kosto është shumë e lartë,”-tha Astrit Haka.

Veç kostos së lartë dhe puna e madhe që duhet në bërë në serë, familja thotë se nuk gjen dot punëtorë të tjerë.  Sipas Astritit, të rinjtë nuk e duan më bujqësinë.

“Unë këtë vit kam 3500 m² trangull edhe me këtë merremi. Përsa i takon fuqisë punëtore familjarisht punojmë burrë e grua, jemi të punësuar nxjerrim një ditë pune. E kemi problem fuqinë punëtore të rinjtë nuk duan t’ia dinë fare për bujqësinë.”

Krahu i punës në zonat rurale tashmë është bërë një sfidë për bizneset bujqësore, jo vetëm në zonat e Peqinit por në të gjithë vendin. Disa prej tyre po detyrohen të paguajnë më shumë për punonjës që banojnë larg vendeve të punës.

LEXONI GJITHASHTU:

• Jo naftë për fermerët, por lekë/ Ndryshon skema e mbështetjes, 8 masa tënë bujqësi
• Ministrja e Bujqësisë me blegtorët e jugut, Denaj: Do të plotësojmë kërkesat