Pogradeci shpallet kampion, mposhti në finale Valbonën 1-0

Pogradeci është skuadra që ka ngritur lart trofeun, si kampione e Kategorisë së Dytë në futboll, ndërsa mposhti në finale Valbonën në shifrat 1-0.

Pak javë pasi skuadrat siguruan ngjitjen, secila pasi u rendit e para në grupin përkatës, luftuan në Elbasan Arena për trofeun e kampionit, që u shkoi liqenorëve. Goli i vetëm i sfidës u shënua nga Danladi në minutën e 64-ët të takimit.

Liqenorët e mbyllën sezonin me 21 ndeshje pa humbje, ndërsa trajneri Samuel Nikaj ka vlerësuar maksimalisht lojtarët.

“Finalet kështu janë, interpretimi i tillë është, nuk pritet lojë e bukur, menaxhuam më mirë se kundërshtari. Pogradeci meriton 10 me yll, 21 ndeshje pa humbje”, tha Nikaj.

Edhe futbollistët Pura e Ivani janë të lumtur për arritjen.

“Mund të luanim më qetë, por fundi i sezonit, lodhja fizike, por e menaxhuam shumë mirë, siç e menduam ashtu shkoi. Kishim menduar më të shkëputur”, u shpreh Pura.

“Duke marrë parasysh që energjitë i kemi konsumuar, ishte qershia mbi tortë, bëmë maksimumin. Pas golit donim të mbronim rezultatin. Sezoni ishte i vështirë, pasi kategoria jonë kishte konkurrencë, ngjitja e vështirë, por nuk na mungoi besimi”, tha Ivani.