“Je në besën tonë”- Momenti kur RENEA prangos babain që mbante peng fëmijët (VIDEO)

Kanë dalë pamjet e momentit të arrestimit të 40-vjeçarit Aleks Marku në Durrës, i cili mbante peng prej disa orësh dy fëmijët e tij të mitur, 6 dhe 11 vjeç.

Marku ka qëlluar me kallashnikov disa herë, teksa ishte duke mbajtur me forcë fëmijët e tij brenda banesës, por edhe në drejtim të Policisë, kur ata kanë mbërritur për ta arrestuar.

Kanë qenë negociatorët nga forcat RENEA ata të cilët kanë arritur ta bindin 40-vjeçarin të dorëzohet.

“Je në besën tonë”, dëgjohet të thuhet përmes një mikrofoni nga efektivët e RENEA-s, për ta bindur 40-vjeçarin të dorëzohej.

Sipas infromacioneve të siguruara nga gazetari i Euronews Albania, Eni Ferhati, vetë i arrestuari është shprehur në deklarimet e tij të para se i ka marre fëmijët për t’i mbrojtur. Ndërkohë po verifikohet nëse ka patur konflikte me bashkëshorten.

Sipas burimeve bashkëshortja e tij do të kthehej ditën e djeshme nga jashtë vendit, ndërsa prej pak ditësh ai ishte zhvendosur ne zonën e Shkëmbit të Kavajës me 2 fëmijët e mitur.

Po ashtu, sipas informacioneve paraprake të siguruara nga Euronews Albania, në të kaluarën gruaja e tij ka qenë e pajisur me urdhër-mbrojtje.

LEXONI GJITHASHTU:

• Mbajti peng fëmijët dhe qëlloi me armë zjarri, forcat RENEA arrestojnë 40-vjeçarin
• FOTO| Mbante peng fëmijët dhe qëllonte me kallashnikov, kush është 40-vjeçari