“Skandali në ujësjellësin e Vlorës”- Jahaj: Paditë e para nisën në vitin 2021

Klevis Jahaj, Drejtor i Agjencisë Kombëtare të Ujësjellës Kanalizimeve ishte këtë të diel i ftuar në “Review” në Euronews Albania për të folur rreth skandalit në ujësjellësin e Vlorës.

Ai tha se paditë e para kanë nisur në vitin 2021. Sipas tij janë rreth 98 çështje të ngritura nga punonjës dhe ish punonjës të shoqërisë së Ujësjellës Kanalizimeve Vlorë.

“Paditë kanë filluar në vitin 2021-2022, më pas ka filluar një tendencë rritje në lidhje me to, vendimet e para janë edhe të vitit të fundit, të muajit prill 2024. Ajo që kemi analizuar janë rreth 98 çështje, pra 98 punonjës, që ose kanë dalë në pension, ose që vazhdojnë punën në shoqëri, ose ish-punonjës. Vendimet që ne kemi zbardhur deri më tani kapin vlerën rreth 100 milionë lekë të reja. Këto janë të vendimeve që janë marrë aktualisht, pra 18 vendime janë zbardhur, ndërsa të tjerat janë ende në proces.

Ky është shqetësimi më i madh. Ne flasim për një shoqëri tregtare ku gjatë gjithë periudhës së vetë, këta punonjës, pagat e tyre, përcaktimet e shpërblimeve përcaktohen nga kushtet financiare të shoqërisë, nga bordet e tyre të administrimit, dhe nga 2007 e në vazhdim, nuk ka pasur asnjë pretendim as me shkrim e as të organizuar nga ana e punonjësve për mungesën e shpërblimeve të vjetërsisë në punë, por është bërë në mënyrë individuale”,-tha Jahaj.

LEXONI GJITHASHTU:

• Skandali me mikro-kreditë, prokuroria e Tiranës urdhër-arrest për 9 persona
• “Ka abuzime”- Balluku: Do kallëzoj në SPAK skemën korruptive të ujësjellësit Vlorë