Tifozi shqiptar nga Gjermania: Broja gol me Kroacinë, do na bëjë krenarë

Sot në orën 15:00 do të luhet ne Hamburg ndeshja Shqipëri-Kroaci. Pritshmëritë e tifozëve janë të larta, të paktën një barazim mund të ishte i kënaqshëm por kjo mbetet për t’u parë gjatë orëve të pasdites.

Shumica e tifozëve ndodhen atje që prej ditës së djeshme dhe janë organizuar edhe në rrjete sociale për të qenë të bashkuar. Ndeshja do luhet në stadiumin “Volksparkstadion” të Hamburgut dhe pritet të dalin edhe të dhëna se sa do të jetë numri i shqiptarëve të pranishëm.

Tifozë nga Shqipëria, Kosova, Maqedonia e Veriut dhe nga çdo shtet ku jetojnë, kanë shkuar në Hamburg për të ndjekur skuadrën e Kombëtares.

Mexhid Ferati, pensionit shqiptar që jeton në Gjermani dhe tifoz i zjarrtë i Kombëtares u shpreh entuziast për një rezultat pozitiv të kuqezinjve përballë Kroacisë. Në një lidhje me emisionin GoodMorning Albanians në Euronews Albania ai i shpreh i sigurt se futbollisti shqiptar Armando Broja do shënojë një gol në këtë ndeshje.

“Nëse do luajë Broja gjithçka do vendosë, jam i bindur se ai do shënojë sot dhe do na bëjë krenarë sot. Jam i bindur në strategun e madh Silvinjo, jam i bindur për një fitore dhe fitore bindëse. Atij i duhet vetëm një moment dhe shpërthen menjëherë. Ishte i bllokuar nga të gjitha anët në ndeshjen me Italinë, nuk kishte mundësi të bënte diçka më tepër”, tha ai.