I shqetësuar për largimin e deputetëve? Basha: Jemi e vetmja alternativë

Ish-kryetari i Partisë Demokratike Lulzim Basha, i ftuar në Euronews Albania këtë të premte, tha se grupimi që ai përfaqëson është e vetmja alternativë në përputhje me idealet e PD-së.

Basha u pyet nga gazetari Thimi Samarxhiu në lidhje me largimin e deputetëve Eralda Bano Tase dhe Kreshnik Çollaku, disa ditë pasi gjykata e Apelit i kaloi vulën e Partisë Demokratike Lulzim Bashës.

Me ironi Basha tha se nuk ka dijeni për largime deputetësh nga grupimi politik që përfaqëson dhe se ky informacion është i panevojshëm.

“Nuk kam asnjë informacion që dikush ka ikur, por kjo nuk ka rëndësi. Edhe duhet ta kuptoni që brenda Partisë Demokratike ne jemi alternativa e vetme me përputhje me idealet. Ne jemi e vetmja alternativë në Partinë Demokratike, kemi të tjerë që kanë humbur rrugën, kemi të tjerë që janë mbytur nga hipokrizia dhe këtu duhet ta kuptosh nuk bëhet për fatin e skuadrës, këtu bëhet për fatin e Shqipërisë, ajo që na bën bashkë është përkushtimi ndaj fatit të qytetarëve, ne besojmë se shqiptarët nuk meritojnë një tango tjetër mes kryeministrit dhe ish- kryeministrit ne valsin apo në muzikën kush është më pak i korruptuar dhe do ti japim Shqipërisë më të mirën. Nëse do të jetë e pamundur që ne të kemi PD nga komploti i kryeministrit me ish- kryeministrin atëherë padiskutim që do te gjejmë mënyra dhe forma të tjera. Ne jemi gati”, tha Basha.