Humbja më e thellë në 200 vite, si u dërrmua në zgjedhje partia e Sunak në Britani

Partia Laburiste ka shënuar një fitore spektakolare në zgjedhjet parlamentare të mbajtura ditën e enjte në Mbretërinë e Bashkuar.

Gjithçka ishte e pritshme pasi fitorja në përmasa të tilla ishte parashikuar nga sondazhet paraprake të publikuara para zgjedhjeve.

Ish-kryeministri Rishi Sunak dhe Partia Konservatore shënuan humbjen më të thellë në historinë gati 200 vjeçare të kësaj force politike, që nga krijimi i saj në vitet 1830.

Kryeredaktori i Departamentit Digjital në Euronews Albania, Franc Mërkuri bëri dhe një pasqyrim të rezultatit të zgjedhjeve në Britaninë e Madhe.

Laburistët kanë siguruar 412 mandate, nga 326 që nevojiten për formimin e qeverisë në parlamentin me 650 ulëse.

Nga ana tjetër Konservatorët kanë siguruar 121 mandate, 250 më pak se në zgjedhjet e fundit parlamentare të vitit 2019.

Britania e Madhe ka një model ekselent të funksionimit të demokracisë, ku nuk ka një periudhë të caktuar të trazicionit të pushtetit, nga njëra forcë politike te tjetra.

Menjëherë pas dhënies së dorëheqjes si kryeministër nga Rishi Sunak, kemi një kryeministër të ri brenda pak orësh. Pas takimit me Mbretin Charles Keir Starmer mori autorizimin për forimin e qeverisë.

Gjatë fundjavës udhëheqësi i ri do të përmbushë emërimin e kabinetit qeveritar, duke filluar nga postet e larta dhe duke kaluar në rolet me më pak përgjegjësi.

Parlamenti pritet ta rinisë punën më 9 korrik. Kryetari i Dhomës së Ulët të Parlamentit do të zgjidhet nga radhët e deputetëve të Parlamentit.

Secili deputet më pas do ta bëjë betimin për besnikëri ndaj mbretit ose do ta bëjë një pohim solemn (deklarim se do ta thotë të vërtetën). Kjo procedurë zakonisht zgjat disa ditë.

Hapja e Parlamentit dhe Fjalimi i Mbretit, që përcakton programin e legjislacionit të Qeverisë për seancën parlamentare, priten më 17 korrik, megjithëse kjo datë mund të ndryshohet nga Qeveria e ardhshme.

Cilat janë politikat e Keir Starmer? Disa nga zotimet:

– Kujdesi shëndetësor: Shkurtimi i listave të pritjes së Shërbimit Shëndetësor Kombëtar, ku do të ofrohen 40,000 takime të tjera çdo javë.

– Emigrimi: Do krijohet një ‘komandë e sigurisë kufitare’ për të ndaluar bandat e trafikantëve që organizojnë kalime të njerëzve me varka të vogla drejt ishullit.

– Strehimi: Do ndërtohen 1.5 milionë shtëpi të reja duke reformuar ligjet e planifikimit dhe do vendoset një skemë përtë lehtësuar blerësit për herë të parë  të një shtëpie të re.

– Arsimi: Lehtësim i taksave për shkollat ​​private.

LEXONI GJITHASHTU:

• Zgjedhjet në Britani: Laburistët shënojnë fitore bindëse, Sunak e pranon humbjen
• “Marr përgjegjësinë për humbjen”- Jep dorëheqjen kryeministri britanik Rishi Sunak