“Vetëm ti do të jesh shpëtimtari i trupit tim”- Poçari tregon historinë e pazakontë

Mjeshtër Ligori, i cili i ka kushtuar gjithë jetën e tij punimeve të baltës, tregoi në një intervistë për emisionin Real People, një histori të pazakontë.

Ai tha se një burrë nga Fieri i kërkoi atij t’i bënte dy punime balte, një tigan e një tenxhere për shak të gjendjes së tij shëndetësore. Ishte mjeku ai që i sugjeroi burrit nga Fieri prodhimet e baltës, ndërsa shpëtimi i trupit të tij duket se ishte në duart e mjeshtër Ligorit.

Mjeshtri shtoi se enët e baltës duhet të jenë më të mira për trupin e njeriut se ato metalike.

“Po të tregoj një rast që ishte një nga Fieri, i cili më thotë nëse bëja prodhime balte.

“Unë dua të bëj një tenxhere balte dhe një tigan prej balte”, më tha. Unë i thashë: “Tenxheren ta bëj, por tiganin nuk mund të ta jap të garantuar pasi nuk e di si do dali. Më tha: “Vetëm ti do jesh shpëtimtari i trupit tim”. Thashë unë çfarë po thotë ky. Nuk e imagjinoja çfarë po thoshte.

Më pas më tha që “ishte i sëmurë dhe doktori e kishte këshilluar të hante vetëm në enë balte”. Çdo ushqim duhet ta hante në enë balte. “Meqenëse qenka puna kështu”, i thashë, “do t’i bëj unë pa lekë”. Njerëzit përpara me enë balte hanin, plaku im është 94-vjeç”, tha ai.

LEXONI GJITHASHTU:

• Artisti i Pedonales rrëfehet në Real People: Pikturat nudo më nxorën nga varfëria
• “Gruas nuk ja mësova kurrë”/ Flet ustai që ruan identitetin e biçikletave të Tiranës