Kushtetuesja rrëzon kërkesën e Kuvendit, mandati i Xhaçkës nuk dërgohet në “Venecia”

Burime për Euronews Albania bëjnë me dije se Gjykata Kushtetuese ka rrëzuar kërkesën e Kuvendit për të dërguar në komisionin e Venecias mandatin e Olta Xhaçkës.

Në fjalën e saj, Kryetarja e Gjyakatës Kushtetuese, Holta Zaçaj, theksoi se vendimi i Gjykatës Kushtetuese i janarit 2023 nuk është zbatuar ende nga Kuvendi.

Zaçaj tha se vendimet e gjykatës nuk duhet të diskutohen por duhet të zbatohen nga politika pa vonesa.

“Gjykata Kushtetuese konstatoi se vendimi i janarit 2023 nuk është ekzekutuar nga Kuvendi.

Përmes vendimit Kuvendi i Shqipërisë ka vënë në diskutim fuqinë detyruese të Gjykatës Kushtetuese. Gjykata theksoi se vendimet e saj kanë efektet dhe forcën e ligjit asnjë organ s’ka të drejtë ti vërë në diskutim. Organet shtetërore duhet ti zbatojnë. Gjykata theksoi se vendimi i saj që ka vendosur detyrimin e Kuvendit për të dërguar në gjykatë mocionin e mandatit është i detyrueshëm për zbatim

Kuvendi duhet të votojë në përputhje me urdhërimin e gjykatës pasi nuk është një procedurë e zakonshme parlamentare. Është në kuadër të ekzekutimit të gjykatës. Gjykata ka vendosur pranimin pjesërisht të kërkesës zgjidhjen e konfliktit me Kuvendi”, tha Zaçaj.

Kujtojmë se ditën e hënë Kuvendi i kërkoi Gjykatës Kushtetuese riçeljen e shqyrtimit gjyqësor lidhur me mandatin e Xhaçkës, me qëllim kërkimin e një opinioni këshillimor, nga Komisioni Evropian për Demokraci përmes Ligjit. Ndihma u kërkua me argumentin se juristët në Shqipëri po përballen me pasiguri juridike në lidhje me këtë rast.

“Ndodhur në kushtet kur krijohet një pasiguri juridike, se përse grupi prej jo më pak se 1/5 e deputetëve nuk mundet që të vendosë në lëvizje Gjykatën Kushtetuese në kundërshtim me rendin kushtetues në fuqi, Kuvendi është i mendimit që duhet të kërkohet një mendim këshillimor nga ana e Komisionit të Venecias, thuhet në kërkesën e cila mban datën 8 korrik.

Shqyrtimi gjyqësor për mandatin e Olta Xhaçkës është mbyllur më 25 qershor dhe deputetja ka fituar çështjen në Kushtetuese, ku opozita pretendoi se Xhaçka shkeli Kushtetutën kur ishte ministre dhe qeveria e saj i dha bashkëshortit biznesmen, Artan Gaçi, statusin e investitorit strategjik për një resort në Himarë.

LEXONI GJITHASHTU:

• SPAK sekuestron 5512 m2 truall të bashkëshortit të ish-ministres Xhaçka
• Mandati i Xhaçkës, Kuvendi: Ti kërkohet mendim Komisionit të Venecias