Spitali i Gramshit pa mjekë. Mungojnë specialistët, qytetarët nuk marrin shërbim

Spitali i Gramshit prej kohësh vuan mungesën e mjekëve specialist. Vetëm përgjatë vitit 2024 janë 8 mjekë specialist më pak që ushtrojnë detyrën në këtë spital.

Pak ditë më parë, mjeku kardiolog Muharrem Murati u nda nga jeta për shkaqe natyrale duke krijuar një boshllëk në sektorin e shërbimit për qytetarët.

Moshat e treta po e përjetojnë më shumë mungesën e bluzave të bardha, e për këtë arsye ata duhet të udhëtojnë drejt kryeqytetit ose Elbasanit për të kryer vizita.

“Shumë shqetësim është, mua më ndodhi një fatkeqësi me zemrën më vdiq gruaja. E çova dhe në Elbasan, e shtruan më thanë s’ka problem, mbas katër ditësh përfundoi”,-tha qytetari.

“Gramshi është shumë keq në këtë drejtim. Kërkojmë që të vijnë specialistë të rinj në Gramsh, se pothuajse janë në pension të gjithë këta që janë”,-tha një tjetër.

Një nga shkaqet që Gramshi po shpopullohet çdo ditë, jo vetëm nga të rinjtë por edhe mosha e tretë, është edhe mungesa e shërbimeve mjekësorë tregojnë banorët.

“Unë për momentin nuk banoj në Gramsh, jam larguar dhe një nga këto arsye është mungesa e mjekëve. E gjithë mosha e tretë e ka të domosdoshme kardiologun. “

Prej kohësh në Gramsh është premtuar se do të hapet një klinikë për trajtimin e sëmundjeve të zemrës, por deri tani asnjë veprim nuk është ndërmarrë. Në spitalin e Gramshit aktualisht punojnë 6 mjekë në moshë pensioni dhe 4 mjekë të tjerë që janë në marrëdhënie pune.

LEXONI GJITHASHTU:

• U plagosën 2 vëllezër, Policia zbulon shkaqet e shpërthimit në makinën në Gramsh
• “Ëndrra mbi levando”, aktiviteti në Gramsh, synon promovimin e natyrës