Një F-16 raportohet të jetë rrëzuar në Ukrainë këtë javë

Një avion luftarak ukrainas, F-16, u shkatërrua pasi u rrëzua më 6 gusht, sipas një zyrtari amerikan që u citua nga Wall Street Journal.

Zyrtari i paidentifikuar amerikan tha se incidenti ndodhi gjatë një sulmi të madh rus në Ukrainë.

Megjithatë, raportimet fillestare tregojnë se F16-shi nuk u rrëzua nga zjarri i armikut, sipas gazetës amerikane dhe agjencisë së lajmeve Reuters, më 29 gusht.

Wall Street Journal tha se avioni u rrëzua me gjasë si pasojë e një gabimi të pilotit.

Forcat Ajrore të Ukrainës nuk e kanë konfirmuar rrëzimin e avionit apo statusin e pilotit.

Rrëzimi i avionit luftarak ndodhi pak javë pasi F16-shat e parë mbërritën në Ukrainë.

Presidenti i Ukrainës, Volodymyr Zelensky, tha se Kievi i përdori për herë të parë këta avionë në luftime për të rrëzuar raketa ruse gjatë sulmeve të kësaj jave, shkruan REL.

Të enjten, Holanda i dha leje Ukrainës t’i përdorë avionët luftarakë F-16 në territorin rus, të cilët i ka dhuruar kohë më parë.

Holanda ia ka dhuruar Ukrainës 24 avionë luftarakë F-16.

F16-shat, të ndërtuar nga Lochheed Martin, kanë qenë dëshirë e kamotshme e Ukrainës, për shkak të forcës së tyre shkatërruese. Ky avion mund të bartë bomba, predha dhe raketa.

Pilotët ukrainas janë trajnuar se si t’i përdorin F16-shat nga partnerët perëndimorë për muaj të tërë.

LEXONI GJITHASHTU:

• Zyrtari i inteligjencës amerikane: Ukraina synon të mbajë territorin rus
• Vrasësi i të moshuarës lirohet për herë të dytë për të luftuar në Ukrainë