Projektligji i ri| Landfille të reja në Shqipëri, privati mund të menaxhojë mbetjet

Kompanitë private mund të menaxhojnë vendgrumbullimet e mbetjeve në vend. Një projektligj i ri i hap rrugë krijimit të landfilleve të reja, por kostot për ndërtimin dhe operimin e tyre do të mbulohen nga privati për një afat deri 30-vjeçar.

Drafti është në konsultim, dhe ndër të tjera synon që kjo fushë të rregullohet që në nisje, me diferencimin e mbetjeve në burim, dhe më pas të bëhet përpunimi i tyre, përmes riciklimit ose djegies në incenerëator.

Por, fillimisht duhet të jenë bashkitë ato që do të rregullojnë mekanizmin, për grumbullimin e diferencuar në disa kontejnerë, e më tej të hapin rrugët për transportin e tyre në landfillet që do të hapen.

Privatët mund të shfaqin interes në këtë industri, e cila mund të rezultojë fitimprurëse, por për të shkuar deri tek diferencimi i mbetjeve, nevojitet edhe edukim masiv i popullatës dhe bizneseve.

Në draft shkruhet se kjo praktikë ligjore ndiqet edhe në Bashkimin Europian në të cilin Shqipëria pret të bëhet anëtare, por që në fushën e mbetjeve vitet e fundit është përballur me një sërë skandalesh dhe aferash të cilat nuk kanë marrë një përgjigje përfundimtare nga drejtësia.

LEXONI GJITHASHTU:

• Mbetjet toksike nga Shqipëria, Shehaj: Alarmuan botën, mund të qëndrojnë në vend
• “Porti nuk ka përgjegjësi për mbetjet”, Balluku: Kurum duhet të japë shpjegime