VIDEO| Mbahet seanca paraprake për Berishën, rikthehet avokati Sokol Mëngjesi

Në Gjykatën e Posaçme zhvillohet këtë të enjte seanca paraprake për ish-kryeministrin Sali Berisha, dhëndrin e tij Jamarbër Maltezi dhe tre të pandehurit e tjerë të dosjes “Partizani”.

Seanca ka nisur në orën 12:00, ku gjykatësja Flojera Davidhi do të marrë vendimin mbi fatin e çështjes dhe gjykimin e të pandehurve.

Në ambientet e gjykatës kanë mbërritur avokatët e Berishës, ndërsa vëmendjen e mori rikthimi i avokatit Sokol Mëngjesi, i cili u plagos rëndë në një sulm të mëparshëm.

Siç shihet dhe nga një video e siguruar nga Euronews Albania, avokati Mëngjesi pritet me përqafime në dyert e Gjykatës së Posaçme.

Gjatë seancës, prokuroria do të paraqesë provat dhe argumentet që mbështesin akuzat ndaj Berishës, të cilat përfshijnë abuzimin me pushtetin dhe korrupsionin gjatë kohës që ai ishte në krye të qeverisë. Avokatët e Berishës, në anën tjetër, kanë kundërshtuar akuzat, duke theksuar se ato janë të motivuara politikisht dhe nuk kanë bazë të fortë ligjore.

Pritet që sot GJKKO të marrë vendimin për kalimin në gjykim ose jo të çështjes gjyqësore ndaj ish-kryeministrit.