Shpërndante kokainë në zonën e Xhamllikut dhe Freskut, arrestohet 28-vjeçari

Një 28-vjeçar është arrestuar në kuadër të operacionit policor të koduar “Green,” të ndërmarrë nga Drejtoria Vendore e Policisë Tiranë për goditjen e veprimtarive kriminale të lidhura me shpërndarjen e narkotikëve.

Gjatë operacionit, u sekuestrua një sasi prej 250 gramësh lëndë e dyshuar si kokainë, pjesërisht e ndarë në doza të gatshme për shitje. Pasi siguruan informacione operative për veprimtarinë e një personi që shpërndante drogë në zonat e Freskut dhe Xhamllikut, shërbimet e Sektorit për Hetimin e Narkotikëve organizuan dhe finalizuan operacionin.

Policia e lokalizoi 28-vjeçarin K. T., banues në Tiranë, duke qarkulluar me automjet në rrugën “Xhanfize Keko.” Gjatë kontrollit të automjetit dhe banesës së tij, u gjet dhe sekuestrua sasia e lëndës narkotike, e cila dyshohet se ndahej në doza për shitje në zonat e Freskut dhe Xhamllikut.

Materialet për këtë rast i kaluan Prokurorisë për hetime të mëtejshme mbi veprën penale “Prodhimi dhe shitja e narkotikëve.”

LEXONI GJITHASHTU:

• Sekuestrohen 6.4 kg kanabis dhe armë zjarri, arrestohet 33-vjeçari
• Itali/ Sekuestrohet kokainë në vlerë 15 mln euro në varreza, arrestohen 3 shqiptarë