Protestuesit solidarizohen me fëmijën, hapin përkohësisht rrugën në Bradashesh

Pas rreth një orë e gjysmë bllokim, qarkullimi i automjeteve në rrethrrotullimin e Bradasheshit u hap përkohësisht, ku u lejua të kalonte një makinë brenda të cilës ndodhej një fëmijë i sëmurë.

Me kërkesë të deputetit të Partisë Demokratike, Tomor Alizoti, protestuesit hapën rrugën për të lejuar kalimin e makinës me fëmijën.

Mbështetësit e opozitës treguan solidaritet me fëmijën e sëmurë duke mundësuar kalimin për të marrë ndihmën e nevojshme drejt spitalit.

Bllokimi i 6 akseve kryesore të vendit nga opozita mbrëmjen e kësaj të marte ka qenë përgjithësisht i qetë dhe pa përplasje mes protestuesve dhe policisë.

Megjithatë një incident është regjistruar në rrethrrotullimin e Levanit, ku një qytetar ka tentuar që me automjetin e tij të çajë kordonin e protestuesve, të cilët kishin bllokuar aksin rrugor që lidh Levanin me Vlorën dhe Tepelenën.

Policia reagoi menjëherë ndaj këtij incidenti, duke ndërhyrë për të larguar automjetin dhe duke shmangur përshkallëzimin e situatës.

Shoferët e bllokuar në akset kryesore të vendit janë treguar relativisht të qetë dhe po presin me qetësi mbylljen e protestës.

LEXONI GJITHASHTU:

• Noka fik makinën dhe bllokon rrugën: Zgjidhje politike për opozitën, ose nuk ndalemi
• “Ka vajtur ku s’mba më” – Opozita bllokon rrethrrotullimin e Levanit
• Trafik kilometrik në autostradën Tiranë-Durrës, bllokohet ambulanca