Masakra në Dobraç, Sali Berisha njofton mbajtjen e një proteste në Shkodër

Kreu i Partisë Demokratike, Sali Berisha, njoftoi mbajtjen e një proteste në Shkodër këtë të shtunë, në orën 12:00, duke shprehur solidaritetin e tij me qytetarët e këtij qyteti.

Berisha akuzoi Edi Ramën se po përdor krimin dhe mafien për të frikësuar banorët dhe për t’ua bërë jetën të pamundur.

“Unë jam këtu për të shprehur solidaritetin tim më të thellë me secilin qytetar të Shkodrës. Edi Rama përdor krimin, mafian më agresive për t’i mposhtur dhe frikësuar ata. Në shenjë solidariteti me qytetarët e Shkodrës, ftoj të gjithë opozitarët kudo që janë, të shtunën në ora 12:00 në Shkodër, si dëshmi që nuk do të pranojmë kurrë që krimi të mposhtë Shkodrën dhe shkodranët,” tha Berisha.

Protesta e demokratëve në Shkodër vjen pas masakrës së 30 tetorit, ku në një atentat në lagjen Dobraç të qytetit u vranë 3 persona, mes tyre dhe një kalimtare e pafajshme

Kreu i PD shtoi se protesta do të jetë një akt mosbindjeje civile ndaj dhunës së mafias së Edi Ramës. “Kjo mosbindje civile do të duhej të thirrej në Tiranë, por dëshiroj t’u shprehim nga afër të gjithë solidaritetin tonë qytetarëve të Shkodrës, për të cilët Edi Rama ka zgjedhur hanxharët e krimit me qëllim të vetëm për të mbledhur vota,” theksoi Berisha.

“Prandaj, ftoj të gjithë opozitarët dhe opozitarët në ora 12:00 në Shkodër, për solidaritet dhe mbështetje qytetare për banorët e mrekullueshëm të këtij qyteti,” përfundoi Berisha.

• Atentati në Shkodër, reagon ministri i Brendshëm Hoxha
• Qitësit ishin 2, iu afruan me Range Rover: Si ndodhi maskara me 3 viktima në Shkodër