Bashkia Tiranë hap aplikimet për 1200 kredi të buta për strehim

Bashkia e Tiranës ka njoftuar hapjen e aplikimeve për programin e subvencionimit të interesave të kredisë, i cili synon të mbështesë familjet dhe individët në nevojë për strehim. Ky program realizohet në bashkëpunim me Ministrinë e Ekonomisë, Kulturës dhe Inovacionit.

Sipas njoftimit, aplikimet do të hapen më 12 dhjetor 2024 dhe do të mbyllen më 13 janar 2025. Familjet dhe individët e interesuar mund të aplikojnë përmes portalit qeveritar “e-Albania”, duke përdorur shërbimin “Kërkesë për të përfituar nga programet e strehimit social”. Aplikantët duhet të përzgjedhin formën e preferuar të trajtimit, përfshirë programin Banesë me Kosto të Ulët ose Subvencionimin e Interesave të Kredisë, në rast se opsioni i parë nuk është i mundshëm.

Kriteret kryesore për aplikim:

• Aplikanti duhet të jetë mbi 18 vjeç në momentin e paraqitjes së kërkesës.
• Familjet nuk duhet të kenë në pronësi një banesë.
• Familjet që zotërojnë sipërfaqe banimi nën normat e strehimit.
• Të ardhurat e familjeve duhet të jenë brenda kufijve të përcaktuar nga programi.

Faza e dytë, që përfshin dorëzimin e dokumentacionit të nevojshëm, do të shpallet me një njoftim të dytë publik. Bashkia informon se për qytetarët që përballen me vështirësi në aksesimin e portalit elektronik, asistenca do të ofrohet pranë njësive administrative.

Programi i Subvencionimit të Interesave të Kredisë është rihapur me qëllim mbështetjen e familjeve dhe çifteve të reja, të cilat nuk kanë mundësi ekonomike për të përballuar tregun e lirë të banesave.

Bashkia thekson se ky program është një mundësi e rëndësishme për familjet që kanë nevojë për mbështetje financiare për blerjen e një banese.

LEXONI GJITHASHTU:

• Çmimet e apartamenteve në rritje, emigrantët dhe familjet e reja, blerësit kryesorë
• Apartamentet e ’92, do shiten më lirë/Ekspertët: Mundësi që çdo kush të blejë shtëpi