Rohde për sulmin në “Ibër-Lepenc”: Të presim hetimet, nuk duhen akuza por prova!

Ambasadori i Gjermanisë në Kosovë, Jorn Rohde, ka folur lidhur me sulmin e para dy javësh në kanalin e ujit të Ibër-Lepencit. Për këtë sulm, Kryeministri Albin Kurti dhe Presidentja Vjosa Osmani, kanë akuzuar Serbinë.

Rohde ka thënë se deri më tani nuk ka asnjë informacion të qartë për të vërtetuar identitetin e autorëve, duke shtuar se hetimet po vazhdojnë.

“Përfaqësuesja e Lartë e cilësoi këtë incident si ngjarje terroriste, të rëndë dhe tani jemi në fazën e hetimit. Nuk mendoj se duhen akuza të tilla, duhen prova. Le ta lëmë hetimin të marrë rrjedhën e tij. Të gjithë aktorët, siç thashë edhe më parë, duhet të përmbahen nga akuzat që mund të cenojnë stabilitetin dhe të shkaktojnë frikë te qytetarët. Deri më tani nuk kishte asnjë informacion të qartë për të vërtetuar identitetin e autorëve. Prandaj, duhet ta lëmë hetimin të vazhdojë”, ka deklaruar Rohde në një intervistë të përbashkët me Ambasadorin e Francës Olivier Gueraud.

Rohde dhe Gueraud kanë folur gjithashtu edhe për dialogun. Sipas Gueraud, dialogu është e vetmja rrugë për zgjidhjen e problemeve dhe normalizimin e marrëdhënieve. Ai tha se qëndrimi i Francës dhe Gjermanisë sa i përket dialogut është i njëjtë.

LEXONI GJITHASHTU:

• Ministrja në Kosovë njofton ‘zgjidhjen e re inxhinierike’ në Ibër Lepenc
• Ministri i jashtëm serb mohon akuzat, dënon sulmin në Ibër Lepenc