Luftime të ashpra në front, Rusia pretendon pushtimin e qytetit kyç në Ukrainë

Rusia deklaroi të hënën se forcat e saj kanë marrë nën kontroll qytetin e Kurakhove në rajonin Donetskut në Ukrainën lindore, një pikë strategjike për avancimin drejt qendrës logjistike të Pokrovsk-ut.

Kurakhove, që ndodhet rreth 35 kilometra në jug të Pokrovsk, ka qenë në qendër të përparimeve ruse në muajt e fundit dhe konsiderohet një pikë kyçe për logjistikën e trupave dhe furnizimeve ukrainase përgjatë vijës së frontit.

Autoritetet ukrainase ende nuk kanë konfirmuar humbjen e qytetit. Viktor Trehubov, zëdhënës i forcave “Khortytsia” të Ukrainës, deklaroi se luftimet vazhdojnë ende brenda qytetit.

Një imazh i publikuar në rrjetet sociale, që duket se tregon një ushtar rus duke ngritur flamurin rus në Kurakhove, është bërë viral në rrjete sociale.

Kapja e qytetit do t’u mundësonte trupave ruse një drejtim të ri për të sulmuar Pokrovsk, duke ndërlikuar mbrojtjen e Ukrainës. Analisti ushtarak Roman Pohorily tha se marrja e Kurakhove përforcon pozitat logjistike të Rusisë dhe rrezikon më tej furnizimet ukrainase.

Përveç kësaj, Ministria ruse e mbrojtjes raportoi se kishte pushtuar edhe fshatin Dachenske, rreth 8 kilometra në jug të Pokrovsk, duke zgjeruar kontrollin mbi rajonin.

Luftimet janë intensifikuar gjithashtu në rajonin e Kurskut të Rusisë, ku Ukraina nisi një kundërsulm të dielën. Ndërkohë, forcat ukrainase duket se po përballen me mungesë të trupave ushtarake dhe humbje të terrenit në lindje të vendit, duke u përballur me një ofensivë të fuqishme ruse.

LEXONI GJITHASHTU:

• Putin: Rusia gati për negociata, por marrëveshja të mos firmoset nga Zelensky
• Putin: Duhet të kisha pushtuar Ukrainën më herët