Kush ishte Jean-Marie Le Pen, pse njihej si “djalli” i politikës franceze

Ish-lideri i ekstremit të djathtë në Francë, Jean-Marie Le Pen, i cili udhëhoqi Frontin Kombëtar (FN) për katër dekada dhe ia dorëzoi drejtimin e partisë vajzës së tij, Marine, ka ndërruar jetë në moshën 96-vjeçare, njoftoi familja e tij. Le Pen ishte një figurë kyçe në politikën franceze dhe një prej liderëve më të diskutueshëm të së djathtës ekstreme në vend.

Le Pen, i njohur për ndikimin e tij të madh në politikën franceze shpesh përshkruhej si një figurë e polarizuar, ku kishte marrë dhe nofkën “djalli” i politikës franceze.

Lindur në vitin 1928 në La Trinité-sur-Mer, në Bretagne, Le Pen humbi babanë e tij gjatë Luftës së Dytë Botërore. Pas luftës, ai studioi në Paris, ku u bë president i shoqatës të studentëve të drejtësisë “Corpo”. Më pas, ai iu bashkua legjionit të huaj për të luftuar në Luftën e Indokinës. Në vitin 1956, ai u zgjodh deputet i Parisit, por më pas shkoi në Algjeri për të marrë pjesë në luftën që shpërtheu atje në vitin 1957.

Në vitin 1972, ai bashkëthemeloi Frontin Kombëtar, një parti politike e orientuar drejt nacionalizmit dhe euroskepticizmit.

Le Pen arriti të rritej në influencë gjatë viteve 1980 dhe 1990, duke sfiduar normat politike tradicionale dhe duke tërhequr një elektorat të majtë dhe të djathtë përmes politikave të tij anti-imigracion dhe euroskeptike. Ai mori pjesë në disa zgjedhje presidenciale, duke fituar një numër të konsiderueshëm votash dhe duke arritur në raundin e dytë të zgjedhjeve të vitit 2002, një ngjarje që tronditi politikën franceze.

Megjithatë, figurën e tij e shoqëruan gjithashtu deklarata dhe veprime kontroverse, përfshirë mohimin e Holokaustit dhe kërcënime të shumta ndaj grupeve të caktuara, çka i solli kritika të mëdha dhe procese gjyqësore.

Në vitin 2011, Jean-Marie Le Pen ia dorëzoi drejtimin e Frontit Kombëtar vajzës së tij, Marine, e cila e udhëhoqi më pas partinë në nivele të reja, duke arritur dy herë të kalonte në raundin e dytë të zgjedhjeve presidenciale të Francës. Ndikimi i Jean-Marie Le Pen në jetën politike të Francës ka qenë i jashtëzakonshëm dhe do të mbahet mend si një nga figurat më të kontestuara të politikës moderne franceze.

Le Pen u tërhoq nga politika aktive në vitin 2019, pas një karriere të gjatë dhe të kontestuar. Ai do të kujtohet për ndikimin që pati në politikën franceze, si dhe për ndihmesën e tij në formësimin e një partie që mbetet një aktor i rëndësishëm në skenën politike të vendit.

LEXONI GJITHASHTU:

• Zgjedhjet në Francë| Partia e ekstremit të djathtë të Le Pen fiton raundin e parë
• “Ringjallja” e Macron, pse dështuan sondazhet dhe nuk u arrit fitorja e Le Pen