Ulja e çmimit të energjisë, Rama: S’e bëj për fushatë, marrim fitoren e 10 radhazi

Kryeministri Edi Rama i ka kthyer përgjigje komentuesve të cilët pretendojnë se çmimi i energjisë u ul me qëllime elektorale.

Përmes një videoje nga zyra e tij e publikuar në faqen e vet në Facebook Rama shprehet se Shqipëria bëhet vendi i parë në Evropë që ul çmimin e energjisë elektrike që pas luftës në Ukrainë.

Ai hedh poshtë pretendimet se kjo është një lëvizje elektorale në prag të zgjedhjeve duke u shprehur se PS e ka të sigurt fitore e 10 radhazi.

”E para, ne nuk e kemi rritur asnjëherë çmimin e energjisë elektrike. Në gjithë botën çmimi është rritur në shumë vende pas nisjes së luftës në Ukrainë. Kjo e jona është ulja e vetme në Evropë për çmimin  e energjisë që nga lufta në Ukrainë. E dyta, kush thotë që është ulje elektorale duhet të më gjejë një veprim të kësaj natyre me karakter elektoral, që të kem bërë për vota kundër logjikës ekonomike financiare të vendit, ose një rast kur një masë pozitive që kemi marrë para një procesi zgjedhor, ta kemi hequr pas fitores së zgjedhjeve?

Nuk ka, mos kërkoni kot se nuk ka ndodhur. Dhe mos harroni dhe një gjë, kur unë nuk i kam bërë këto më parë kur kisha dhe të tjerë në prehër, do t’i bëj në prag të zgjedhjeve që do marrim fitoren e 10-të radhazi që do ketë notën dhjetë për nga thellësia e rezultatit dhe diferenca me kundërshtarët”, tha Rama.