Vrasja e të moshuarit, policia: Autori e qëlloi me çekiç në kokë dhe i mori paratë

Drejtori i policisë së Tiranës, Elton Alushi tregoi në një deklaratë për mediat pasditen e së mërkurës dinamikën e ngjarjes së ndodhur 2 ditë më parë në Shengjin i Vogël, në Qafmollë të Tiranës, ku një i moshuar u gjet i pajetë në oborrin e banesës.

Ai tha se 81-vjeçari Xhemal Meta ishte qëlluar në kokë me mjete të forta, çekiç nga shtetasi Isuf Hasa, 64 vjeç, tashmë i arrestuar, duke i shkaktuar vdekjen e menjëhershme.

Arma e përdorur në krim u gjet në banesën e vajzës së autorit të dyshuar, në zonën e Vorës.

“Nga tërësia e veprimeve të thelluara hetimore ka rezultuar se më datë 13.01.2025, rreth ores 09:00, shtetasi Isuf Hasa, 64 vjeç, ka shkuar në banesën e fqinjit të tij Xhemal Meta dhe për motive të dobëta e ka qëlluar atë me një mjet të fortë (çekiç) në pjesën e pasme të kokës duke i shkaktuar vdekjen.

Nga veprimet hetimore dyshohet se autori i dyshuar Isuf Hasa, pasi e ka goditur viktimen i ka marrë dhe një sasi vlerash monetare që ai mbante në xhep, dhe më pas është larguar.

Nga kontrollet e shumta të kryera në disa banesa të autorit dhe familjarëve të tij, janë gjetur dhe sekuestruar një sasi prej 200.000 lekë të rinj.

Po nga kontrollet e ushtruara në banesën e shtetases L.H,(vajza e autorit të dyshuar)  në fshatin Gjokaj, Vorë, Shërbimet e Policisë gjetën dhe sekuestruan në cilësinë e provës materiale sendin e dyshuar (çekiç) më të cilin autori ka kryer vrasjen”, bëri me dije kreu i policisë së Tiranës.

LEXONI GJITHASHTU:

• Vrasja në Postribë, ngujohet familja e autorit, pajtuesit e gjaqeve nisin misionin
• Vrasja e biznesmenit në Tiranë, merren në pyetje familjarët, zbërthehet telefoni