Atentati ndaj Kristian Markut në Vlorë, kapet personi që i siguroi makinën autorëve

Pas hetimeve të thelluara dhe mbështetjes nga inteligjenca informative, Policia e Vlorës ka ndaluar një shtetas të dyshuar për lidhje me vrasjen e Kristian Markut, e ndodhur më 13 janar 2025 në Vlorë.

Në vijim të operacionit për zbardhjen e ngjarjes, është ndaluar shtetasi Erald Cenaj, 36 vjeç, nga Kukësi, i dyshuar për sigurimin e automjetit që vrasësit përdorën në krimin e rëndë.

Dyshohet se automjeti i përdorur për vrasjen e Markut është siguruar nga 36-vjeçari Erald Cenaj i cili është ndaluar mbi akuzën e veprës penale “Sigurimi i kushteve dhe mjeteve materiale për të kryer vrasje”.

“Nga tërësia e veprimeve hetimore të kryera deri tani nga specialistët për Hetimin e Krimeve të Rënda në DVP Vlorë, nën drejtimin e prokurorit të çështjes, u arrit të dokumentohej se automjeti i përdorur nga autori/ët për vrasjen e shtetasit Kristian Marku alias Kristian Bardhi është siguruar nga shtetasi Erald Cenaj, lindur dhe banues në qytetin e Kukësit”, thuhet në njotimin e policisë.

Njëkohësisht, gjatë periudhës hetimore janë kryer veprime dhe janë sekuestruar prova që i shërbejnë hetimit me qëllim zbardhjen e ngjarjes.

Në bashkëpunim të ngushtë me Departamentin e Policisë Kriminale në Drejtorinë e Përgjithshme të Policisë së Shtetit dhe Prokurorinë e Juridiksionit të Përgjithshëm Vlorë, vijojnë veprimet e thelluara hetimore për zbardhjen e plotë të ngjarjes, identifikimin dhe kapjen e autorit/ëve.

LEXONI GJITHASHTU:

• Vrasja e Kristian Markut, detaje nga hetimet: Vrasësit dyshohet se ikën në Kosovë
• Ekskluzive/ Rindërtohet skena, si ndodhi atentati ndaj Kristian Markut në Fier-Vlorë