Nënkryetari i PD, Bylykbashi: Prokuroria të zhvillojë hetim të krimeve zgjedhore

Pas një takimi në Prokurorinë e Përgjithshme, dy drejtuesit e Partisë Demokratike, Oerd Bylykbashi dhe Ivi Kaso kërkuan që për krimet zgjedhore dhe parregullsitë gjatë fushatës elektorale të përfshihen edhe prokurorët e juridiksionit të përgjithshëm.

Sipas Oerd Bylykbashit, Prokuroria do duhet të ketë një plan të qartë dhe efikas për parandalimin e fenomeneve zgjedhore që janë vërejtur në proceset e mëparshme.

“Në kërkuam që Prokuroria të ketë një plan masash të qartë, të detajuar dhe pa vonesë në mënyrë që të kemi një veprim efikas. Jemi të qartë që kuadri ligjor i jep mundësi të mëdha sistemi të Prokurorisë për të goditur paraprakisht krimin zgjedhor”, tha nënkryetari i PD.

Ndërkaq, Bylykbashi komentoi edhe planin e masave të SPAK për zgjedhjet e 11 majit, duke theksuar se tashmë mund të konsiderohet shumë vonë për prezantimin e një platforme të tillë.

“Letra dhe deklarata i vlejnë askujt përderisa nuk ka veprim dhe efikasitet. Janë shumë vonë me faktin se kanë vite tashmë që kanë për kompetencë. Më shumë se kërcëllima e dhëmbëve, rëndësi kanë faktet. Sa persona shkojnë dhe dënohen për krim dhe korrupsion zgjedhor për shitblerjen e votës që ka filluar sot këtu dhe në diasporë”, shtoi Oerd Bylykbashi.

LEXONI GJITHASHTU:

• Kandidatët e PD për 11 majin, 3 variantet e primareve që po diskutohen në selinë blu
• “E gjithë Shqipëria zbret në Tiranë”- Berisha njofton protestën kombëtare të PD