Hapet shtëpia muze “Agolli”, ekspozohen letërkëmbimet mes Dritëroit dhe Sadijes

Letrat e dashurisë së Dritëro Agollit dhe objektet personale të tij u ekspozuan për herë të parë mbrëmjen e të martës në shtëpinë muze të shkrimtarit, që tashmë do të jetë e hapur për publikun për një muaj.

Në shtëpinë-muze të prozatorit dhe poetit të madh, mbrëmja e 4 shkurtit zhurmoi nga vizitat e miqve, adhuruesve e gazetarëve të shumtë, të pranishëm në ekspozitën me dorëshkrimet e letrave të dashurisë mes shkrimtarit dhe njeriut të tij të zemrës, Sadijes.

Të pranishmit e kujtuan të madhin Agolli mes letrave, objekteve personale dhe zërit të tij, që është kudo në shtëpinë ku jetoi me familjen e tij të madhe.

Drejtoresha e Shtëpive Studio Kadare-Agolli, Anisa Ymeri, u shpreh mes të tjerash se me përfundimin e ekspozitës, dorëshkrimet, do të qëndrojnë në fondin e shtëpisë-muze.

Ishte e bija e Dritëroit, Elona, ajo që kontribuoi me dorëshkrime e objekte të tjera, për këtë ekspozitë.

Në shtëpinë e Dritëroit u ekspozuan: veshje të çiftit nga koha e rinisë, kur shkruanin letrat e dashurisë, orët e të dyve, një gjerdan me perla i Sadijes, dy portrete nga Lumturi Blloshmi, një bust i Dritëroit nga Ilmi Kasemi, objekte shtëpiake, si dhe stilografi i tij funksional, me të cilin po shkruhen letra gjatë ekspozitës.

LEXONI GJITHASHTU:

• ​8 vjet nga humbja e jetës së Dritëro Agollit
• Shtëpi muze për Dritëro Agollin, në fshatin e tij të lindjes do jenë veprat e tij