“Kultivimi i kanabisit”, GJKKO pushon çështjen ndaj kryebashkiakut të Libohovës

Gjykata e Posaçme ka pushuar çështjen ndaj kryebashkiakut socialist të Libohovës, Leonard Hide.

Hide ishte marrë i pandehur nga SPAK dhe akuzohej për shpërdorim detyre lidhur me kultivimin e kanabisit në zonën e Gjirokastrës gjatë kohës kur mbante funksionin e Shefit të Krimeve.

Hetimi për këtë çështje u krye nga ish-Shërbimi për Çështjet e Brendshme dhe Ankesat, si dhe nga Prokuroria e Gjirokastrës.

Akuzat përfshinin mosmarrjen e masave për parandalimin e kultivimit të kanabisit, pasi, në vitin 2021, në Gjirokastër u zbuluan disa plantacione me qindra bimë narkotike.

Hetimet e nisura në 1 shtator 2021 zbuluan se disa kontrolle nga policia lokale ishin shmangur, ndërsa në rrugë informative kishte informacion për mundësinë e bashkëpunimit të zyrtarëve të policisë me trafikantët e drogës.

Përfshirja e Hides në këtë aktivitet u konstatua gjatë hetimeve me metoda proaktive dhe transkriptimeve të realizuara nga Prokuroria e Gjirokastrës, e cila regjistroi procedimin penal.

Megjithatë, pas hetimeve, Prokuroria e Gjirokastrës shpalli mos-kompetencë dhe e kaloi çështjen në SPAK, duke i dorëzuar hetimet këtij organi të posaçëm për ndjekjen e krimeve të rënda.

LEXONI GJITHASHTU:

• Kryebashkiaku i Libohovës paraqitet në Prokurorinë e Posaçme
• Akuzohet se lejoi kultivimin e kanabistit, kryebashkiaku i Libohovës shkon në SPAK