Goditet grupi kriminal i trafikut të drogës në Divjakë, 3 të arrestuar, 10 në hetim

Policia e Fierit ka finalizuar me sukses operacionin e koduar “Zona”, duke goditur një grup kriminal të përfshirë në shpërndarjen e kokainës në Divjakë. Operacioni erdhi si rezultat i një hetimi gjashtëmujor të ndjekur me metoda speciale, në bashkëpunim me Prokurorinë e Fierit.

Si pjesë e këtij operacioni, janë arrestuar tre persona:

• A. P., 30 vjeç, dhe M. P., 32 vjeç, vëllezër dhe bashkëorganizatorë të grupit kriminal;
• O. L., 31 vjeç, i ndaluar me urdhër të Prokurorisë;
• Ndaj shtetasve V. Rr. dhe S. B. ka nisur procedimi në gjendje të lirë;
• Ndërkohë, më parë gjatë hetimeve, është arrestuar edhe shtetasi E. T.

Nga kontrollet e zhvilluara gjatë operacionit janë sekuestruar dhjetëra doza kokainë, 3 armë gjahu dhe 1 armë sportive, 1 armë e ftohtë dhe municion luftarak, 2 peshore elektronike si dhe shuma parash në euro dhe lekë, të përfituara nga shitja e drogës.

Hetimet po vijojnë ndërkohë që policia ka shoqëruar edhe 10 persona të tjerë, të dyshuar për përfshirjen e tyre në këtë aktivitet kriminal.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme ligjore.

LEXONI GJITHASHTU:

• Gjendet një bombë në stacionin e Francës, ndërpriten trenat në Gare du Nord
• Zelensky njofton vizitën në Arabinë Saudite, pjesë e takimit edhe SHBA-ja