Fitore spektakolare e Barcelonës, marrin përkohësisht kreun e La Liga-s

Barcelona ka marrë një fitore spektakolare të dielën në La Liga, ku përmbysi Atletikon e Madridit nga 2-0 në 2-4. Blaugranët marrin kështu kreun e La Ligas, madje me një ndeshje më pak të luajtur.

Përballja e kreut Atletico Madrid-Barcelona ka dhuruar spektakël për të pranishmit në Wanda Metropolitano, por një rezultat aspak në favor të tyre, duke u larguar përkohësisht 4 pikë nga kreu i klasifikimit. Blaugranët e Hansi Flick edhe pse e nisën jo mirë ia dolën që në fund t’u gëzohen 3 pikëve. Pjesa e parë ishte e ekuilibruar, por vendësit arritën të gjejnë avantazhin nëpërmjet një kundërsulmi të shpejtë me autor të përhershmin Julian Alvarez.

Me nisjen e pjesës së dytë, Simeone hodhi në fushë dyshen Gallagher-Sørloth e ishte norvegjezi ai i cili u asistua nga mesfushori britanik dhe shënoi për 2-0. E vështirë ishte, por jo e pamundur, me Barcelonën që në më tepër se 20 minuta realizoi 4 herë në portën e Oblak.

Lewandowski e pas tij Ferran Torres rikthyen barazpeshën, por më tej Yamal shënoi të tretin, ndërsa rezultatin 4-2 e vulosi dhe një herë Ferran në minutën e 8 të shtesës. Fitore për Barcelonën që shkon në kuotën e 60 pikëve, baraz me Realin, por me një ndeshje më pak, ndërsa Atletico qëndron e treta me 4 pikë më pak. Kjo ishte humbja e dytë radhazi për Los Colchoneros në kampionat.

LEXONI GJITHASHTU:

• Barcelona perfekte në La Liga, blaugranët me 6 fitore radhazi
• Champions League/ Dramë në limite, Barcelona përmbys 4-5 Benficën! Zhgënjen Juventus