Dhunonte bashkëshorten dhe ngacmonte vajzën e saj, dërgohet për gjykim kryefamiljari

Prokuroria e Fierit ka dërguar për gjykim për dhunë në familje shtetasin A.R., i cili akuzohet dhe për “Ngacmim seksual” dhe “Keqtrajtim të të miturit”.

Hetimet nisën pas një kërkese për urdhër mbrojtje nga bashkëshortja e tij ndërsa pas hetimeve të prokurorisë burri u vendos nën akuzat dhe dyshimet se ka dhunuar fizikisht dhe psikologjikisht gruan si dhe ka keqtrajtuar fëmijën e mitur të saj (që gruaja e ka nga martesa e parë) duke avancuar deri në veprime që kanë natyrë të ngacmimit seksual ndaj të miturës.

Njoftimi i Prokurorisë

Prokuroria pranë Gjykatës së Shkallës së Parë të Juridiksionit të Përgjithshëm Fier, përfundon hetimet dhe dërgon në gjyq shtetasin A.R. për veprën penale ‘Ngacmim seksual’ dhe ‘Keqtrajtimi i të miturit’ parashikuar nga nenet 130/a/4, 108/a/2 dhe 124/b/1 të Kodit Penal.

Hetimet në kuadër të procedimit penal nr.1755 të vitit 2024, nisën pas shqyrtimit të kërkesës së shtetases B.R. ndaj bashkëshortit të saj në Gjykatën e Shkallës së Parë të Juridiksionit të Përgjithshëm Fier me objekt lëshimin e urdhërit të mbrojtjes. Në përfundim, gjyqtari i çështjes ka vlerësuar se faktet e referuara nga kjo shtetase përmbajnë elementë të veprës penale dhe për këtë shkak ka bërë referimin përkatës në prokurori.

Organi i akuzës në bashkëpunim me policinë gjyqësore, ka arritur të provojë se në periudha të ndryshme, shtetasi A.R. ka ushtruar dhunë fizike dhe psikologjike ndaj bashkëshortes së tij si dhe ka kryer veprime aktive ndaj të miturës R.Ç.  (fëmijës që bashkëshortja e tij kishte nga martesa e parë), që konsistojnë në keqtrajtimin vijues të saj dhe kanë avancuar në veprime që kanë natyrë të ngacmimit seksual të saj.

Pas kryerjes së veprime hetimore, Prokuroria pranë Gjykatës së Shkallës së Parë të Juridiksionit të Përgjithshëm Fier ka dërguar për gjykim kërkesën penale ndaj shtetasit A.R. për veprën penale “Dhuna në familje” në dëm të shtetases B.R. “Ngacmimi seksual” dhe  “Keqtrajtimi i të miturit” në dëm të miturës R.Ç, parashikuar nga nenet 130/a/4, 108/a/2  dhe 124/b/1 i K.Penal”, thuhet në njoftimin e Prokurorisë së Fierit.

LEXONI GJITHASHTU:

• Gazetarja nga Fieri: Dy agjensitë funerale u zunë për personin që do varrosej
• PS zyrtarizon listën e kandidatëve për deputetë për qarkun e Fierit