Interes nga Spanja për Brojën, Celta Vigo po vëzhgon nga afër futbollistin

Prej kohësh ka qenë i dëmtuar, si gjatë qëndrimit te Chelsea, po ashtu dhe në dy huazimet te Fulham e Everton, por ky fakt nuk e pengon aspak Armando Brojën të jetë në qendër të merkatos.

Sulmuesi kuqezi është në orbitën e Celta Vigo, ndërsa media spanjolle Fichajes ka konfirmuar interesin e skuadrës në fjalë, e cila po e ndjek nga afër yllin kuqezi. Anësori konsiderohet si një lojtar që mund të marrë rol kryesor në skuadër, ndaj një lëvizje drejt La Ligas do të ishte e mundur në verë.

Më tej, Fichajes liston arsye se përse ai do të largohet, së pari nuk ka bindur drejtuesit e Everton e më tej konsiderohet i pavend te Chelsea. Shpejtësia dhe forma e tij fizike janë marrë në konsideratë nga drejtuesi e Celta Vigo, skuadër e cila po çalon së tepërmi në repartin ofensiv këtë sezon.

Ardhja e shqiptarit pohojnë spanjollët do ti jepte frymëmarrje sulmit, ndërsa i garantohet vendi i titullarit. Nëse lëvizja do të arrihet, gjithçka do të ndodhë pas periudhës së huazimit, ku thuhet se Everton nuk do ta mbajë futbollistin. Ndërkohë në anën tjetër, Broja ka treguar dëshirën për të qëndruar në kampionatin anglez, pasi edhe më herët ka pasur interes nga Seria A.