Fluks vizitash të fëmijëve të sëmurë, mjekët pediatër: Shkak bëhen luhatjet e motit

Dy javët e fundit të marsit janë pasuar me shtim të fëmijëve të sëmurë që kanë patur nevojë për ndihmën e mjekut. Vetëm një mjek pediatër në poliklinikën numër 2 është dashur të vizitojë mesatarisht 25 fëmijë në ditë. Ata thonë se problematikat janë të shumta nga virozat deri tek alergjitë e stinës.

“Virozat po rikthehen me temperaturë të lartë te fëmijët, me sekrecione, me kollë, me dhimbje veshi, lodhje, diarre, të vjella por edhe alergji”, tha pediatre Brati.

Mjekja pediatre thotë se shkak i këtij fluksi të shtuar pacientësh janë luhatjet e motit ndaj dhe këshillon prindërit të bëjnë kujdes.

“Prindërit duhet të jenë të kujdesshëm këto ditë, të mos neglizhojnë simptomat. Ata duhet të paraqiten te mjeku nëse fëmija ka dy ditë me temperaturë të lartë. Prindërit duhet t’i çojnë në urgjencë menjëherë në raste të komplikuara dhe të sigurohen që fëmijët të ushqehen dhe me lëngje”, shpjegoi Sonila Brati.

Ashtu si dhe një vit më parë, mjekja parashikon që virozat e ndryshme tek fëmijët do të jenë prezent gjatë gjithë vitit, me luhatje të vogla në shifra.

LEXONI GJITHASHTU:

• Vota e diasporës, në datë 5 prill nis dërgimi i zarfeve te emigrantët
• Detaje nga ngjarja në Kosovë, pronari i furrës qëlloi punëtoren dhe më pas veten