Teliti: Premtimet ekonomike të Ramës ngjajnë me ato të PD-së, i quante të pamundura

I ftuar në emisionin “Review” në Euronews Albania, nënkryetari i Këshillit Bashkiak të Tiranës, Dorjan Teliti, ka komentuar premtimet ekonomike të partive politike për zgjedhjet e 11 majit.

Ai theksoi se shumë nga premtimet që kryeministri Edi Rama po bën në fushatën aktuale, janë të ngjashme me ato që ka propozuar Partia Demokratike gjatë vitit të fundit.

Sipas tij, shumë nga pikat që Rama po i reklamon tani janë të ngjashme me ato të PD-së, për të cilat kryeministri ka thënë më herët se ishin të pamundura për të realizuar për shkak të pasigurisë financiare dhe pasojave të mundshme në buxhetin e shtetit.

Teliti e cilësoi këtë si kontradiktë që ekziston ndërmjet premtimeve që Rama po jep dhe deklaratave të mëparshme të tij.

“Po të shikoni pikat kryesore, ato janë të programit të Partisë Demokratike, që ne i kemi prezantuar prej një viti. Një ditë të bukur, del kryeministri dhe reklamon një program për mandatin e katërt të tij, i cili ka një ngjashmëri të frikshme me programin e PD-së. Ne na duket sikur është një tallje, sepse kur ne i prezantuam këto pika, vetë kryeministri na akuzonte dhe thoshte se nëse do të implementoheshin këto premtime të PD, shteti shqiptar do të falimentonte. Por tani, ai vjen dhe premton të njëjtat gjëra,” tha Teliti.

LEXONI GJITHASHTU:

• Rama me shqiptarët në Athinë: Kush kthehet në Shqipëri, do të jetë më mirë se këtu
• Rama: Si sot një vit do hapet konsullata e Shqipërisë në Kretë