Fusha e mbetjeve në Orikum, mbeturinat rrezikojnë jetën e banorëve prej 20 vitesh

Prej më shumë se 20 vitesh në fushën e Orikumit depozitohen afro 10 mijë ton mbetje, mes të cilave edhe kafshë të ngordhura, apo goma makinash e mobilje të vjetra.

Banorët e njësisë administrative Orikum thonë se mbetjet urbane që depozitohen në zemrën e kësaj njësie, janë kthyer për ta një gangrenë e vërtetë e cila vazhdon prej vitesh. Kjo fushë e vendgrumbullimit të mbeturinave sipas banorëve shkakton ndotje mbi normat e lejuara në zonë, të cilat përfundojnë edhe në det.

Erërat e pakëndshme por edhe tymi kancerogjen që vjen sa herë që aty ka raste të zjarrvënës së qëllimshme, ka bërë që banorëve tu rrezikohet shëndeti, para kamerës së Euronews Albania ata kanë treguar problemet që po hasin nga kjo situatë:

“Ka që kur ishte bashkia, si nuk është problematik, e vërteta është që dy fëmijë në një djep nuk tunden o turizëm o pisllëk, këtu ka pisllëk.”

“Ka shumë vite është problematike, se herë u vendoset zjarr e vjen erë shumë e keqe, ndihet bëhet tym, re, kam frikë, si s’kam, ne jemi me probleme, të sëmurë. Te vendi ku është, janë hapur tokat, i merr era, atë s’e di, po është shumë problematike se atje çfarë nuk hidhet, kafshë e çdo gjë.”

“Ka që në ’90 e deri tani, këta këtu afër e kanë më keq.”

“Shumë keq një ambient i qelbur, një gjë që nuk vë dorë njeri, ka shumë vite nuk hapim dot dritaret, u qelbem, po si s’kam frikë, kam fëmijë, s’hap dot dritaren.”

Në fushën e vendgrumbullimit të mbeturinave që gjendet në krah të aksit Orikum-Dukat-Llogora, por edhe në hyrjen e Bypassit të Vlorës në këtë njësi, janë depozituar mbetjet urbane të Orikumit dhe fshatrave përreth tij prej më shumë se 2 dekadash.

LEXONI GJITHASHTU:

• Të ardhurat nga puna online, 33 milionë në 2024. Ekspertët: Është edhe më e lartë
• Adem Hoxha: Mbështetja jonë për qeverinë e Kurtit, ende në pikëpyetje