U raportua si vetëvrasje, zbardhet ngjarja pas 7 vitesh: Në kërkim ish-partnerja

Gjykata e Korçës ka caktuar masën e sigurisë arrest me burg në mungesë për Kejsi Spahillarin si e dyshuar për pjesmarrje në vrasjen e të riut Antonio Karafili 7 vite më parë në Voskopojë i cili u gjet i varur në një pemë.

Edhe pse ngjarja u regjistrua dhe u hetua si vetëvrasje, pasi 18-vjecari Antonio Karafili u gjet i varur me çarçaf në një pemë në fshatin Voskopojë, prokuroria vijoi hetimet duke mbledhur prova dhe vlerësuar indiciet, të cilat krijonin dyshime për implikim në ngjarje të së dashurës së Antonios, Kejsi Spahillari dhe një të riu tjetër, Rexhep Vathit.

Sipas prokurorisë, nga provat biologjike dyshohet se Rexhep Vathi dhe Kejsi Spahillari e kanë mbytur Antonio Karafilin dhe e kanë varur në pemë me një çarçaf, duke e bërë të duket si vetëvrasje.

Motivi i krimit dyshohet të jetë lidhja paralele që Kejsi Spahillari kishte me viktimën dhe Rexhep Vathin.

Pas krimit, Spahillari emigroi në Kanada, ndërsa në gusht të 2024, Rexhep Vathi vrau veten.

Prokuroria e Korçës ka nxjerrë urdhrin e arrestit për Spahillarin, ndërsa gjykata e Korçës caktoi masën e sigurisë arrest me burg në mungese për akuzën e vrasjes me dashje në bashkëpunim.

Pas kësaj, pritet që Prokuroria e Korçës të procedojë me urdhër arresti ndërkombëtar për Kejsi Spahillarin, e cila prej disa vitesh jeton në Kanada ku ka krijuar familje.

LEXONI GJITHASHTU:

• Eksperti: Instituti i Mjekësisë ligjore ka dështuar, zvarrisin mijëra raste
• Vrasja e Martin Çeços, Gjykata dënon me 83 vjet burg 4 persona