Shpërthimi me tritol në Elbasan, arrestohet pronari i banesës dhe nipi i tij

Policia e Elbasanit ka vënë në pranga dy persona në lidhje me shpërthimin në një apartament në qytetin e Elbasanit.

Burime nga policia bëjnë të ditur se është arrestuar në tentativë për t’u larguar drejt Greqisë pronari i apartamentit ku ndodhi shpërthimi, 43-vjeçari Arbër Pepa.

Ai dyshohet nga hetuesit se inskenoi shpërthimin me tritol në apartamentin e tij në qytetin e Elbasanit.

Përveç pronarit të apartamentit, policia ka arrestuar edhe nipin e tij, 18-vjeçarin E. T., pasi dyshon se të dy kanë organizuar vendosjen dhe më pas shpërthimin e eksplozivit në banesën e Pepës.

Nga burime policore thuhet se ka dyshime se vendosja e lëndës plasëse është bërë me qëllim që ngjarja të përdorej si arsye për të përfituar azil në vendet e BE-së.

Ata u arrestuan nën akuzat për veprat penale “Shkatërrimi i pronës me eksploziv” dhe “Mbajtja pa leje dhe prodhimi i armëve, armëve shpërthyese dhe municionit”.

Arbër Pepa, i cili banonte në apartamentin ku ndodhi shpërthimi gjatë mbrëmjes së të mërkurës në Elbasan, u arrestua teksa tentoi të kalonte kufirin drejt Greqisë, së bashku me gruan dhe fëmijën ndërsa nipi i tij u kap në qytetin e Elbasanit.

Njoftimi i policisë

“Strukturat hetimore të Komisariatit të Policisë Elbasan, menjëherë pas ngjarjes së ndodhur në mesnatë, në lagjen “Partizani”, organizuan punën për zbardhjen dhe dokumentimin ligjor, identifikimin dhe kapjen e autorit/ve.

Si rezultat i veprimeve të shpejta hetimore, bazuar dhe në informacionet e siguruara nga inteligjenca informative, në kuadër të operacionin policor të koduar “Inskenimi”., u bë e mundur zbardhja e ngjarjes dhe identifikimi i autorëve.

Po në vijim të operacionit u bë arrestimi për veprat penale “Shkatërrimi i pronës me eksploziv” dhe “Mbajtja pa leje dhe prodhimi i armëve, armëve shpërthyese dhe municionit”, i shtetasve A. P., 43 vjeç, i zoti i banesës ku shpërtheu lënda plasëse dhe E. T., 18 vjeç, nipi i tij.

Shtetasi A. P., dyshohet se ka vendosur lëndë eksplozive para banesës së tij në bashkëpunim me nipin, shtetasin E. T., me qëllim përfitimin e azilit në një nga vendet e BE-së. Si pasojë e shpërthimit janë shkaktuar vetëm dëme materiale.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme”, thuhet në njoftimin e policisë.

LEXONI GJITHASHTU:

• Zbardhet shpërthimi me tritol në Elbasan, u inskenua nga pronari të fitonte azil
• Shpërthimi në Elbasan, banorët tregojnë tmerrin: Zemra na rrihte pa pushim